భార్య వాట్సాప్ ఛాట్ మొత్తం చూసేశాడని...

Posted: 06/13/2017 08:45 AM IST

అక్రమ సంబంధాలు అనుబంధాలను బొంద పెట్టేస్తున్నాయి. పెళ్లయ్యాక కూడా రోజురోజుకీ దిగజారి ప్రవర్తిస్తున్న వారు ఎందరో. ప్రియుడి కోసం భర్తను వదిలేసిన ఓ భార్య దారుణానికి తెగబడింది. తన అనుమతి లేకుండా భర్త  చేసిన పనితో మంటపుట్టి అతన్ని నరికి ప్రియుడితో పరారైంది.

ఉత్తరప్రదేశ్ లోని ఖేరాఘ‌ర్ లోని భిలావ‌లి గ్రామానికి చెందిన నేత్రాపాల్ కు 2014 లో నీతూ సింగ్ తో వివాహం అయ్యింది. అయితే అప్పటికే ఓ యువకుడిని ప్రేమించిన నీతూ సింగ్ పెద్దవాళ్ల బలవంతం మేరకు పెళ్లి చేసుకున్నట్లు నేత్రాపాల్ కు అర్థమైంది. దీంతో భార్యను వదిలేసి విడాకులకు దరఖాస్తు చేసుకున్నాడు. ఇంతలో కుటుంబంలో ఓ వేడుకకు హాజరైన ఈ ఇద్దరు ఎదురు పడ్డారు. భార్య పదే పదే ఫోన్ లో బిజీగా ఉండటంతో చిర్రెత్తుకొచ్చిన ఆ భర్త దాన్ని లాక్కుకున్నాడు. ఆపై ప్రియుడితో నీతూ చేసిన వాట్సాప్ ఛాట్ మొత్తం చూసేశాడు.

బలవంతంగా ఫోన్ ను లాగేసుకోవటంతో ఆగ్రహానికి గురైన నీతూ ఆవేశంలో అతనిపై దాడి చేసింది. కొడవలితో తలపై నరికింది. దీంతో బంధువులు అతనిని ఆసుపత్రికి తరలించారు. ఈ హడావుడిలో భయానికి గురైన నీతూ ప్రియుడితో పరారైంది. చివరకు బంధువులను వారిద్దరిని పట్టుకుని చితకబాది పోలీసులకు అప్పగించారు. అయితే తమ ప్రేమకు అడ్డు తగిలేందుకు నేత్రాపాల్ తనకు తానే గాయం చేసుకున్నాడని నీతూ ఆరోపిస్తోంది.