మధ్యప్రదేశ్ ప్రమాదంలో 23కు చేరిన మృతుల సంఖ్య

Posted: 06/08/2017 12:10 PM IST

Mp firecracker factory blast death toll raises to 23

మధ్యప్రదేశ్‌లోని బాణాసంచా కర్మాగారంలో సంభవించిన అగ్నిప్రమాదంలో మృతుల సంఖ్య 23కు చేరింది. ఈ ప్రమాదంలో తీవ్ర గాయాలపాలైన వారిలో ఇంకా పలువురి పరిస్థితి విషమంగానే వుందని వైద్యవర్గాలు తెలిపాయి. బాలాఘాట్ జిల్లాలోని ఓ బాణసంచా కర్మాగారంలో క్రితం రోజు సాయంత్రం పెద్ద విస్పోటనంతో అగ్నిప్రమాదం సంభవించిన విషయం తెలిసిందే. ఈ కార్మగారంలో పనిచేస్తున్న కార్మకులు మరీ ముఖ్యంగా దినసరి కూలీలు తమ ప్రాణాలను కొల్పోయారు.

ఈ దుర్ఘటన‌ జరుగగానే 14 మంది అక్కడిక‌క్కడే ప్రాణాలు కోల్పోగా మ‌రో పది మందికి తీవ్రగాయాల‌య్యాయి. కాగా క్షతగాత్రులను బాలాఘాట్ లోని జిల్లా అస్పత్రితో పాటు పక్కనున్న చత్తీస్ గడ్ రాష్ట్రంలోని భిల్లాయ్ అస్పత్రికి తరలించి చికిత్స అందిస్తున్నారు. కాగా చికిత్స పోందుతున్న కార్మికులలో కూడా కొందరు అసువులు బాయడంతో మృతుల సంఖ్య 23కు చేరుకుంది. ప్రమాదం కార‌ణంగా బాణసంచా కర్మాగారంలో పెద్దఎత్తున మంటలు ఎగసిపడ్డాయ‌ని స్థానికులు పేర్కొన్నారు.

ప్రమాద స్థలికి చేరుకున్న అగ్నిమాప‌క సిబ్బంది మంట‌ల‌ను అదుపుచేశారు. వహీద్ అహ్మద్ వార్సీకి చెందిన ఈ పరిశ్రమ జిల్లాలోని అటవీ ప్రాంతంలో ఖైరీ గ్రామంలో నెలకొనడంతో.. క్షతగాత్రులను వెంటనే అస్పత్రికి తరలించడం లో జాప్యం ఏర్పడిందని కార్మిక సంఘాలు అరోపిస్తున్నాయి. అయితే ప్రమాదానికి కారణాలు మాత్రం ఇంకా తెలియరాలేదని అధికారులు తెలిపారు.ఈ ప్రమాదం షాట్ స‌ర్క్యూట్ వ‌ల్ల జ‌రిగిందా? లేక మ‌రే కార‌ణం వ‌ల్లయినా జ‌రిగిందా? అనే అంశంపై పోలీసులు ఆరా తీస్తున్నారు.