ప్రియుడితో పెళ్లి చేయాలని సెల్ టవర్ ఎక్కిన వివాహిత

Posted: 05/05/2017 12:27 PM IST

త‌న ప్రియుడితో పెళ్లి చేయాల‌ని డిమాండ్ చేస్తూ ఓ వివాహిత సెల్‌ టవర్‌ ఎక్కిన ఘటన గుంటూరు జిల్లాలో కలకలం రేపింది. తన ప్రియుడితో పెళ్లి చేయకపోతే తాను దూకి చనిపోతానని బెదిరింపులు కూడా పాల్పడింది. ఈ విష‌యం తెలుసుకున్న స్థానికులు పోలీసు, రెవెన్యూ అధికారులకు సమాచారం అందించారు. దీంతో రంగంలోకి దిగిన అదికారులు ఘటనాస్థలానికి చేరుకుని వివాహిత డిమాండ్లకు అంగీకరించారు. అమెకు అన్ని విధాల నచ్చజెప్పి చాకచక్యంగా సెల్ టవర్ దిగేలా చర్యలు తీసుకున్నారు. దీంతో వివాహిత సెల్ టవర్ నుంచి కిందకు దిగడంతో అంతా ఊపిరి పీల్చుకున్నారు. అనంత‌రం ఆ మ‌హిళ‌ను పోలీసుస్టేషనుకు తీసుకెళ్లి కౌన్సెలింగ్‌ ఇచ్చారు.

వివాహిత మహిళను పోలీసులు మహిళా పోలిస్ స్టేషన్ కు తరలించి.. అమెకు కౌన్సిలింగ్ ఇచ్చారు. ఈ ఘటన గుంటూరు జిల్లా శావల్యాపురం మండలంలోని కనమర్లపూడి గ్రామంలో చోటుచేసుకుంది. పోలీసులు తెలిపిన వివ‌రాల ప్రకారం.. ఎస్సీ కాలనీకి చెందిన ముట్లూరి లాజరు.. కుటుంబ సభ్యులు జీవనోపాధి నిమిత్తం కర్నూలు జిల్లాకు వెళ్లి అక్కడ పనులు చేసి తిరిగి తమ స్వగ్రామానికి వస్తుంటాడు. అక్కడ ఆయనకు ముస్లిం వివాహిత పఠాన్‌ షాహీనీతో పరిచయం ఏర్పడింది. దీంతో ఇద్దరి మధ్య ప్రేమ వికసించింది.

కర్నూలు జిల్లాలో పనులు ముగియ‌డంతో లాజ‌రు త‌న తల్లిదండ్రులతో పాటు గుంటూరులోని స్వగ్రామానికి చేరుకున్నాడు. అతనితో పాటు వివాహిత షాహీనీని కూడా గుంటూరు తీసుకొచ్చాడు. అప్పటికే ఆమె త‌న భ‌ర్తతో వ‌చ్చిన విభేదాల కార‌ణంగా ఆయ‌నతో దూరంగా వుంటుంది. దీంతో వీరు అక్కడే సహజీవనం కూడా చేశారు. అయితే త‌న‌ను పెళ్లి చేసుకోవాలని లాజరుని షాహీని డిమాండ్ చేసింది. భర్త నుంచి విడాకులు తీసుకొని వస్తేనే పెళ్లి చేసుకుంటాన‌ని లాజరు ఆమెకు చెప్పాడు. దీంతో దిక్కుతోచని షాహీనీ సెల్‌టవర్‌ ఎక్కి లాజరుతో పెళ్లి చేయాలన్న డిమాండ్ తో హల్ చల్ చేసింది.