చనిపోయిన నాలుగేళ్ల తర్వాత ఫోటోలు ...

Posted: 05/04/2017 11:35 AM IST

ఒక మనిషికి ఆఖరి క్షణాలు ఎంత నరకప్రాయంగా ఉంటాయో తెలియజెప్పే చిత్రం ఇది. సరిగ్గా నాలుగేళ్ల క్రితం అమెరికా భద్రత దళాలు అఫ్ఘనిస్థాన్ లో పేలుళ్లపై అవగాహన కోసం ఓ కార్యక్రమం నిర్వహించాయి. ఇందులో భాగంగా ఓ మోటర్ ట్యూబ్ సడన్ గా పేలిపోవటంతో భారీ విస్ఫోటనం సంభవించి ఐదుగురు చనిపోయారు. కట్.. చేస్తే ఇప్పుడు ఆ పేలుడుకు సంబంధించిన ఫోటోలు విడుదల అయ్యాయి.

ఇంతకీ ఈ ఫోటోలు తీసింది ఎవరో కాదు హిల్దా క్లేటన్ అనే యువతి. 22 ఏళ్ల క్లేటన్ ఆర్మీకి సంబంధించిన ఫోటో గ్రాఫర్. చిన్న వయసులోనే డాక్యుమెంటరీ లను తీయటం పనిగా పెట్టుకుంది. తర్వాత దేశ సేవ కోసం యూఎస్ భద్రతా దళాల్లో చేరి, అక్కడ కూడా తన ఇంట్రెస్ట్ ను కొనసాగించింది. అలా అఫ్ఘనిస్థాన్ లో యూఎస్ భద్రతా దళాల డాక్యుమెంటరీలను షూట్ చేయటం మొదలుపెట్టింది.

2013 జూలై 2న  లాగ్ మన్ వద్ద అప్ఘన్ సైనికులకు శిక్షణ ఇచ్చే కార్యక్రమం షూట్ చేస్తుండగా పొరపాటున బాంబు పేలింది. ఈ దాడిలో కార్యక్రమాన్ని కవర్ చేస్తున్న క్లేటన్ తోపాటు ఆమె సహాయకుడు, మరో ముగ్గురు సైనికులు చనిపోయారు. ఆ ఘటన తర్వాత ఇన్నేళ్లకు మిలిటరీ రివ్యూ పేరిట వెలువడే జర్నల్ లో ఆ ఆఖరి క్షణాలను రిలీజ్ చేసింది. మంటలు ఒక్కసారిగా ఎగిసి పడి, దుమ్ము దూలి పేరుకుపోయి ఉండటం, సైనికుల ఫోటోలు అందులో చూడొచ్చు.

క్లేటన్ తీసిన ఆఖరి ఫోటోల గురించి ఆ కథనంలో ప్రత్యేకంగా ప్రస్తావిస్తూ ఆమె చేసిన సేవలను కొనియాడారు సైనిక అధికారులు. ఆర్మీలో ఉండగా ఆమెనంతా లాంగ్ నైఫ్ అని పిలిచేవారని, చాలా చురుకుగా ఆమె పని చేసేదని ఓ అధికారి ఆమె గురించి చెబుతూ కన్నీటి పర్యంతం అయ్యాడు.