చిన్నమ్మను అమ్మ ఆత్మే తరిమేసిందంట...

Posted: 05/04/2017 09:19 AM IST

తమిళనాడు మాజీ ముఖ్యమంత్రి మృతిపై విచారణ.. ఇది పన్నీర్ సెల్వం చేస్తున్న ప్రధాన డిమాండ్. అయితే ఆ విషయంలో ఎందుకనో పళనీ వర్గం వెనకంజ వేస్తుంది. శశికళ అండ్ కో ను పక్కన పెట్టేందుకు సిద్ధంగా ఉన్నప్పటికీ వేద నిలయంలో ఏం జరిగింది? ఆమె చికిత్స విషయం ఎందుకు దాస్తున్నారన్నది పరిశీలిస్తే తెరవెనుక ఏదో పెద్ద మతలబే ఉండి ఉంటుదన్నది అర్థమైపోతుంది. ఇదిలా ఉంటే అమ్మ చనిపోయిన సమయంలో మెరీనా బీచ్ వద్దే ఆత్మగా మారి తిరుగుతుందని ఓ వార్త అప్పట్లో కలకలమే రేపింది.

తమను విడిచి వెళ్లటం ఇష్టం లేకనే ఉండిపోయిందని కొందరు, తమిళ రాజకీయాల కల్లోలం భరించలేకే ఆత్మ క్షోభించి ఇక్కడే ఉండిపోయిందని ఇంకొందరు చెప్పుకున్నారు. ఇదిలా ఉంటే ఆమె ఇల్లు వేద నిలయానికి సంబంధించిన ఒక సంచలన విషయం ఇప్పుడు హాట్ టాపిక్ గా మారింది. అమ్మ ఆత్మ దెయ్యమై వేద నిలయంలో తిరుగుతోందన్న ప్రచారం రోజు రోజుకి పెరుగుతోంది. రాత్రి అయితే చాలు.. వేద నిలయంలో అరుపులు, కేకలతో దద్దరిల్లుతోందన్న ప్రచారం అంతకంతకూ పెరుగుతోంది. వేద నిలయం నుంచి వస్తున్న శబ్దాలతో చుట్టుపక్కలవారు భయభ్రాంతులకు గురి అవుతున్నట్లుగా ప్రచారం జరుగుతోంది.

అమ్మ మరణం తర్వాత.. ఆమె నెచ్చెలి శశికళ వేద నిలయంలోనే ఉండటం.. ఆమె పుణ్యమా అని మన్నార్ గుడి మాఫియా అమ్మకు ఇష్టమైన ఇంట్లో తిష్ట వేశారు. అక్రమాస్తుల కేసులో ఎప్పుడైతే చిన్నమ్మ, ఆపై ఈసీ లంచం కేసులో దినకరన్ జైలుకు వెళ్లారు. ఇక వారిని తరిమేసిన అమ్మ నచ్చని వారు వేదనిలయం వైపు వెళితే చాలు.. పెద్దపెద్దగా శబ్దాలు చేస్తూ హడలెత్తిస్తున్నారన్న ప్రచారం జరుగుతోంది. అయితే.. ఇదంతా కావాలని చేస్తున్న ప్రచారమని.. శశికళ తరఫు వారు వేద నిలయాన్ని తమ సొంతం చేసుకోవటానికి ఆడుతున్న డ్రామాగా పలువురు చెబుతున్నారు. అధికారులు వేద నిలయంలోకి అడుగుపెట్టటానికి సైతం భయపడేలా చేయటం కోసమే చిన్నమ్మ వర్గమే ఇలాంటి దుష్ప్రచారం చేస్తున్నారన్న విమర్శ వినిపిస్తోంది. ఒకప్పుడు అమ్మ, అనుచరులతో కళకళలాడిన వేదనిలయం, ఇప్పుడు దెయ్యం ప్రచారంతో భవిష్యత్తులో బూజు బంగ్లాగా మారినా ఆశ్చర్యపోవాల్సిన అవసరం లేదేమో.