ఎస్బీఐ కొత్త రూల్స్.. మరీ దారుణం

Posted: 03/21/2017 07:40 AM IST

Sbi minimum balance norm draws house fire

ప్రైవేట్ బ్యాంకులకు తీసిపోకుండా అతిపెద్ద ప్రభుత్వ రంగ బ్యాంకు భారతీయ స్టేట్ బ్యాంకు(ఎస్బీఐ) ఇటీవ‌ల తీసుకొచ్చిన ప‌లు నిబంధ‌న‌ల‌పై ఖాతాదారులు ఆగ్రహాంతో ఊగిపోతున్నారు. అవసరమైతే అకౌంట్లు మూసేస్తామే తప్ప వారు పెట్టే అడ్డమైన నిబంధనలను పాటించమని చెప్పేస్తున్నారు. అదలా ఉండగానే బ్యాంకింగ్ వ్యవస్థను దెబ్బ తీసేలా వచ్చే నెలలో నిరసనలకు సిద్ధమౌతున్న విషయం తెలిసిందే. మరోవైపు ఇదే అంశంపై పార్లమెంట్ లో ప్రతిపక్షాలు గళం వినిపించాయి.

రాజ్య‌స‌భ‌లో సోమవారం మధ్యాహ్నాం వాడి వేడి చర్చ జరిగింది. సేవింగ్స్‌ బ్యాంక్‌ ఖాతాలో కనీసం రూ.5 వేల బ్యాలెన్స్ ఉంచాల‌న్న బ్యాంకు నిబంధ‌న‌పై విప‌క్ష స‌భ్యులు గళం ఎత్తారు. కొత్త నిబంధ‌న‌ల‌న్నింటినీ తొల‌గించాల్సిందేన‌ని డిమాండ్ చేశారు. తొలుత సీపీఐ సభ్యుడు కేకే రాజేశ్ ఈ అంశంపై మాట్లాడుతూ మినిమం బ్యాలెన్స్ లేకుంటే జ‌రిమానా విధిస్తామ‌ని ఓ ప్రభుత్వ బ్యాంకు ఇలా చెప్పటం దారుణమని మండిపడ్డాడు. ఆ నిబంధ‌న వ‌ల్ల దాదాపు 31 కోట్ల మంది ఖాతాదారులు ఇబ్బందిప‌డతారని ఆయన అంటున్నాడు.

ప్రభుత్వం చెప్పిందనే బ్యాంకు ఖాతాలు తెరిచి, న‌గ‌దు ర‌హిత లావాదేవీలు చేస్తోన్న పేద‌, మ‌ధ్య‌ త‌ర‌గ‌తి ప్ర‌జ‌లకే ఇది సంకటమని వారంటున్నారు. ఒకేసారి 500 నుంచి 5000 లకు పెంచటమేంటని ప్రశ్నించాడు. కార్పొరేట్ శక్తులను ఏం చేయలేని బ్యాంకులు, లోన్లు తీసుకునే రైతులను టార్గెట్ చేయటం శోచనీయమన్న కాంగ్రెస్ తక్షణమే ఆ నిబంధనలను తొలగించాలని కోరుతూ నినాదాలు చేస్తూ పెద్ద రచ్చే చేసింది. కాగా, వచ్చే నెల 1 నుంచి(ఏప్రిల్ 1) ఖాతాలో మినిమమ్ బ్యాలెన్స్ లేకపోతే భారీగా బాదేందుకు సిద్ధమౌతున్న విషయం తెలిసిందే.