విజయ్ కాంత్ రె‘ఢీ’... దీపకు వేధింపులు??

Posted: 03/13/2017 10:39 AM IST

మాజీ ముఖ్యమంత్రి జయలలిత మరణానంతంరం ఖాళీ అయిన ఆర్కే నగర్ (రాధాకృష్ణన్) నియోజకవర్గానికి వచ్చే నెల (ఏప్రిల్) 12న ఉపఎన్నిక జరగనున్న విషయం తెలిసిందే. ఈ నేపథ్యంలో ఎవరికి వారు గెలుపుపై ధీమా వ్యక్తం చేస్తున్నారు. ఇప్పటిదాకా జయకు కంచుకోటగా ఉన్న ఈ స్థానంలో సరైన వారసులు ఎవరో తెలే ఎన్నికలు కావటంతో అందరి చూపు ఇప్పుడు అక్కడే ఉంది. అయితే జయ లేని లోటును వాడుకుని తాము లాభపడాలని మిగతా పార్టీలన్నీ తెగ ప్రయత్నాలు చేస్తున్నాయి.

ఓపక్క ‘జయ జిరాక్స్’ మేనకొడలు అయిన దీప జయకుమార్, మరోపక్క జయలలిత ఆశయాలు సాధించే వ్యక్తినంటూ చెప్పుకుంటున్న పన్నీరు సెల్వం, ఇంకోపక్క సీఎం పళనిస్వామి కూడా పార్టీ అభ్యర్థులను నిలబెట్టనున్నట్టు తెలుస్తోంది. అదే సమయంలో విజయం సాధించడం ద్వారా జయలలిత మద్దతుదారులు శశికళ వెంట లేరని నిరూపించాలని మరోపకాక్ డీఎంకే భావిస్తోంది. ఇంతలో సందట్లో సడేమియా అన్న చందాన తాము కూడా పోటీకి సిద్ధమంటూ డీఎండీకే పార్టీ ప్రకటించింది.

ఈ విషయాన్ని నటుడు, ఆ పార్టీ అధ్యక్షుడు అయిన విజయకాంత్ స్వయంగా తెలిపాడు. అయితే గతంలో అరవకుర్చి, తంజావూరు, తిరుప్పరంకుండ్రం ఉప ఎన్నికల్లో ఒంటరిగా పోటీ చేసి ఘోరపరాజయం పొంది, కనీసం డిపాజిట్ కూడా డీఎండీకే సాధించలేకపోయింది. ఈ నేపథ్యంలో విజయ్ కాంత్ నిర్ణయం పై అంతా ఆశ్చర్యం వ్యక్తం చేస్తున్నారు. ఓట్లను చీల్చటం ద్వారా అయినా పూర్తి మెజార్టీ ఎవరికీ దక్కకుండా చేయాలని ప్రతీ పార్టీ యత్నిస్తున్నట్లు పరిణామాలు చూస్తే అర్థమైపోతుంది. డీఎండీకే తరపున కార్యదర్శకులు మదివానన లేదా అబ్దుల్లాను బరిలో దించనున్నట్టు తెలుస్తోంది.

ఇక పురుచ్ఛితలైవి మేనకోడలు దీపకు తీవ్ర ఒత్తిళ్లు ప్రారంభమయ్యాయి. ఎన్నికల్లో పోటీ చేస్తే ఆమెను చంపేస్తామని కొందరు రౌడీలు బెదిరింపునకు దిగారంట. ఈ విషయాన్ని ఆమే స్వయంగా వెల్లడించారు. పార్టీ ప్రకటించాక తనపై వేధింపులు ప్రారంభమయ్యాయని ఆమె తెలిపారు. గూండాలు తరచూ తన నివాసం వద్దకు వస్తున్నారని... ఈ క్రమంలో తాను తన ఇంట్లో కూడా ఉండటం లేదని ఆమె తీవ్ర ఆవేదన వ్యక్తం చేస్తోంది.