12 గంటల తర్వాత కాల్చి చంపేశారు

Posted: 03/08/2017 08:19 AM IST

Lucknow encounter ends after more than 12 hours

ఓవైపు చివరి దశ పొలింగ్ జరుగుతున్న వేళ ఉత్తరప్రదేశ్ రాజధాని లక్నో నడిబొడ్డున మంగళవారం ఓ ఉగ్రవాది కలకలం రేపిన విషయం తెలిసిందే. ఎట్టకేలకు అతన్ని ఎన్ కౌంటర్ లో మట్టుపెట్టారు పోలీసులు. విశ్వసనీయ సమాచారంతో టెర్రరిస్టుల కోసం వల వేసిన ఏటీఎస్ దళాల ఆనుపానులు గమనించిన ఉగ్రవాది లక్నోలోని ఠాకూర్ గంజ్ లోని ఓ ఇంట్లో దాక్కుని కాల్పులు ప్రారంభించాడు. దీంతో అప్రమత్తమైన ఏటీఎస్ దళాలు ఆ ఇంటిని చుట్టుముట్టాయి.

కాల్పులు, ఎదురు కాల్పులతో మార్మోగిపోయింది. బాగా చీకటిగా ఉండటంతో తొలుత ఇంటి లోపల ఇద్దరు టెర్రరిస్టులు ఉన్నట్లు అధికారులు భావించారు. ఏకధాటిగా 12 గంటలపాటు ఈ కాల్పులు కొనసాగటం విశేషం. మరోవైపు తొలుత ఏం జరుగుతుందో అర్థంకాక స్థానికులు భీతిల్లిపోయారు. ఉదయం మూడు గంటల ప్రాంతంలో ఆపరేషన్ ముగిసినట్లు పోలీసులు వెల్లడించారు. ఓ మృతదేహం, గన్, కత్తి స్వాధీనం చేసుకున్నారు.

ఇక చనిపోయిన వ్యక్తిని ఐఎస్ ఉగ్రవాది సైఫుల్లాగా పోలీసులు గుర్తించారు. ఇరాక్, సిరియా దేశాల్లో చావుదెబ్బ తిన్న ఇస్లామిక్ స్టేట్ ఉగ్రవాద సంస్థ ప్రస్తుతం ఇండియాపై కన్నేసిందని, భారత్ ను స్థావరంగా చేసుకునే దాడులు చేయబోతుందన్న అనుమానాలు కూడా ఓవైపు కలుగుతున్నాయి.

ఇస్లామిక్ స్టేట్ ఉగ్రవాద సంస్థ ప్రభావంతోనే సైఫుల్లా పనిచేశాడని, ఐసిస్ ఖురసాన్ మాడ్యూల్‌కు చెందివాడని యూపీ పోలీసులు నిర్ధారించారు. బహుశా మంగళవారం ఉదయం జరిగిన రైలు పేలుడుకు ఇతగాడికి ఏమైనా సంబంధం ఉందా? అని ఆరాతీస్తున్నారు. ఉజ్జయిని-భోపాల్ మధ్య ప్యాసింజర్ రైలులో నిన్న ఘటన జరగ్గా, తొమ్మిది మంది తీవ్రంగా గాయపడిన విషయం తెలిసిందే. ప్రస్తుతం అక్కడి రైల్వే స్టేషన్ లలో సీసీ పుటేజీల ఆధారంగా ఆరుగురు అనుమానితులను కూడా అదుపులోకి తీసుకుని విచారిస్తున్నట్లు వారు వెల్లడించారు.