బీఫ్ తిన్నారని యువతుల గ్యాంగ్ రేప్, ఇద్దరి హత్య

Posted: 09/12/2016 08:46 AM IST

బీఫ్ మరోసారి దేశంలో ప్రకంపనలు పుట్టించింది. హర్యానాలో మరో దారుణ ఘటన వెలుగుచూసింది. బీఫ్ తిన్నారనే నెపంతో ఓ కుటుంబంపై దాడికి దిగిన కొందరు దుండగులు ఆ కుటుంబంలోని ఇద్దరు మహిళలపై సామూహిక అత్యాచారానికి పాల్పడ్డారు. మరో ఇద్దరిని దారుణంగా కొట్టి చంపారు.

మేవాత్ లో వారం రోజుల క్రితమే ఈ ఘటన జరగ్గా, దుండగుల భీకర దాడితో బెంబేలెత్తిపోయిన బాధిత మహిళలు నిన్నటిదాకా నోరు విప్పేందుకే భయపడ్డారు. చివరకు నిన్న కాస్తంత ధైర్యం చేసిన బాధితులు ఈ ఘటనపై పోలీసులకు ఫిర్యాదు చేశారు.

బీఫ్ తిన్నారన్న ఆరోపణలతో దుండగుల దండు ఓ రోజు బాధితుల ఇంటిలోకి చొరబడింది. భయాందోళనలతో వణికిపోతున్న 14, 20 ఏళ్ల యువతులపై దుండగుల దండు సామూహిక అత్యాచారం చేసింది. ఆ సమయంలో వారి అత్తామామలు అడ్డుకునే ప్రయత్నం చేయగా, వారిని మంచానికి కట్టేసి తీవ్రంగా కొట్టారు. దాంతో వారిద్దరు అక్కడికక్కడే ప్రాణాలు వదిలారు. ఈ ఘోరంపై ఆదివారం బాధితుల నుంచి అందిన ఫిర్యాదుతో రంగంలోకి దిగినర పోలీసులు నలుగురు నిందితులను అరెస్ట్ చేశారు.

కాగా, హర్యానాలో గోవధ నిషేధం. ఎవరైనా బీఫ్ ను అమ్మినా, దాచినా 10 ఏళ్ల జైలు శిక్షతోపాటు, లక్ష నుంచి 5 లక్షల దాకా జరిమానా విధిస్తారు.