పెళ్లి పేరుతో యువతిని బంధించి..

Posted: 07/14/2016 10:42 AM IST

Teenage girl kept in captivity and raped in tamilnadu

మాయమాటలతో యువతిని లోబర్చుకున్నాడు.. పెళ్లి పేరుతో అమెను లేవదీసుకుపోయాడు. ఆనక తన తల్లిదండ్రులు చూసిన వివాహం చేసుకునేందుకు సిద్దమై.. తనకు సర్వస్వం దారపోసిన యువతిని అమె గ్రామశివార్లలో వదిలి పారిపోయాడు. పెళ్లితో నమ్మించి, ఇంట్లో బంధించి యువతిపై ప్రతిరోజు అత్యాచారానికి పాల్పడిన ప్రబుద్దుడిని, అతని అక్కా, బావలను పట్టుకునేందుకు తమిళనాడు పోలీసులు రంగంలోకి దిగారు. ఈ ఘటన తమిళనాడులోని తిరునెల్వేలి జిల్లాలో చోటుచేసుకుంది.

తిరునెల్వేలి జిల్లా వన్నార్‌పేట్టై వాస్తవ్యుడైన ఇమ్మాన్యుయేల్ (24) తిరుపూరులోని ఒక మిల్లులో పనిచేస్తున్నాడు. అతని అక్క సెల్వి అమె భర్తతో కలసి మానూరు సమీపంలోని ఒక గ్రామంలో నివసిస్తోంది. అక్క ఇంటికి తరచూ వచ్చే ఇమ్మాన్యుయేల్‌కు ఆ గ్రామంలోని ప్లస్‌టూ చదువుతున్న బాలిక (17)తో స్నేహం ఏర్పడింది. అది క్రమంగా ప్రేమాయణంగా మారింది. అంతే ఆ బాలికను మాయమాటలతో నమ్మించిన ఇమాన్యూయల్.. గత నెల పదో తేదీన బాలికను తిరుపూరుకు తీసుకెళ్లి అక్కడి గుడిలో రహస్యంగా పెళ్లి చేసుకుని అక్కడే ఒక ఇంట్లో కాపురం పెట్టాడు.

ప్రతిరోజూ పనికి వెళ్లేటప్పుడు బాలికను ఇంట్లోనే ఉంచి తాళం వేసేవాడు. రాత్రి తిరిగి వచ్చేవరకు బాలికను ఇంట్లోనే బందీగా ఉంచేవాడు. ఈ క్రమంలో ఇమ్మాన్యుయేల్‌కు అతడి తల్లిదండ్రులు వేరే సంబంధం చూశారు. దీంతో బాలికను వదిలించుకునేందుకు మాయమాటలు చెప్పి ఈనెల 5వ తేదీన కారులో తీసుకెళ్లి ఊరి శివార్లతో వదిలి వెళ్లిపోయాడు. తనకు జరిగిన అన్యాయాన్ని తల్లికి చెప్పి ఇద్దరూ కలిసి ఇమ్మాన్యుయేల్ అక్క ఇంటికి వెళ్లగా అక్క సెల్వి, ఆమె భర్త నటరాజన్ వీరిపై దాడిచేసి తరిమికొట్టారు. తిరునెల్వేలి పోలీసులకు ఫిర్యాదు చేయగా, పారిపోయిన ముగ్గురు నిందితుల కోసం గాలిస్తున్నారు.