ITEMVIDEOS:నెట్ లో కేరళ వృద్ధురాలి వీడియో... ఏముంది?

Posted: 06/23/2016 10:45 AM IST

వయసుతో సంబంధం లేకుండా ఈ బామ్మ చేస్తున్న పని చూస్తుంటే ఎవరికైనా మతిపోవటం ఖాయం. ఆరుపదులు దాటగానే పళ్లు ఊడిపోయి, నడవలేని స్థితిలో కనీసం ఊతకర్ర సాయం తీసుకునే వాళ్లం చూసుంటాం. కానీ, ఈ పెద్దావిడ 76 ఏళ్ల వయసులో ఇలా చేస్తుందంటే హాట్సాఫ్ చెప్పక మానరు. ఎందుకంటే ఈమె కృషి, పట్టుదల అలాంటిది.

వివరాల్లోకి వెళ్తే... కేరళలోని వటకార ప్రాంతానికి వెళ్తే అక్కడ మీనాక్షమ్మ అనే వృద్ధురాలు కనిపిస్తుంది. ఆమె సాదాసీదా ముసలామె అనుకుంటే పొరపాటే. కర్ర, కత్తి సాములో నాకెవరూ సాటి రారంటు ఎగురుతోంది. తన ఫీట్లతో ఈ వయస్సులోనూ వావ్ అనిపిస్తోంది. కలరియపాయత్తు అని పిలుచుకునే ఈ విద్యను ఆమె చిన్నతనం నుంచే వంటపట్టించుకుందట. క్రమం తప్పకుండా రోజూ సాధన చేస్తానని చెబుతోంది. ఈ వయసులోనూ తన ప్రత్యర్థిని మట్టి కరిపించడంలో దిట్ట. తన దగ్గరకు వచ్చేవారిని శిష్యులుగా అంగీకరించి వారికి ఈ విద్య నేర్పిస్తూ బిజీగా ఉంటుంది.

‘ఎరైజింగ్’ ఇండియా పేరిట ఆమె చేసిన కర్రసామును ఇటీవల ఒకరు ఫేస్ బుక్ లో పోస్ట్ చేశారు. సుమారు 9 లక్షల మంది ఆ వీడియో చూశారంటే అర్థం చేసుకోవచ్చు. చీర కొంగును నడుముకి బిగించి మీనాక్షమ్మ ఓ యుక్తవయసు వ్యక్తితో చేసిన కర్రసాము చూసి మీరు అబ్బో అనకమానరు.

భాస్కర్