ఫోన్ లో రూ. 20కే 100 టీవీ చానల్స్

Posted: 06/23/2016 11:34 AM IST

మార్కెట్ పోటీకి అనుగుణంగా టీవీ చానళ్ల ప్రసారాల విషయంలో ఆయా కంపెనీలు కొత్త కొత్త ఆఫర్లతో కస్టమర్లను ఆకర్షించేందుకు యత్నిస్తున్నాయి. ముఖ్యంగా స్మార్ట్ ఫోన్ల వినియోగం పెరిగిపోతుండటంతో దానిని కూడా క్యాష్ చేసుకునేందుకు కొత్త వ్యూహాలు రచిస్తున్నాయి. వినోద రంగంలో అతిపెద్ద కంపెనీగా ఉన్న జీ గ్రూపు మరో అడుగు ముందుకు వేసింది. డిట్టో టీవీ యాప్ ద్వారా స్మార్ట్ ఫోన్ యూజర్లకు తక్కువ ధరకే టీవీ చానళ్ల ప్రసారాలను అందించేందుకు ముందుకు వచ్చింది.

నెలకు 20 రూపాయలకే 100కు పైగా టీవీ చానళ్ల ప్రసారాలను అందుకోవచ్చు. జీ గ్రూపు సిటీ కేబుల్, ఐడియా సెల్యులర్ నెట్ వర్క్ లతో భాగస్వామ్యం కుదుర్చుకుని డిట్టో టీవీ ప్రసారాలను అందిస్తోంది. డిట్టో టీవీ చానల్ నెలవారీ చందా 20 రూపాయలుగా కంపెనీ ప్రకటించింది. ఐడియా 3జీ, 4జీ చందాదారులు నెలవారీ డేటా ప్యాక్ తో ఉచితంగా డిట్టో టీవీ చందాదారులుగా చేరేందుకు అవకాశం కల్పిస్తోంది.

ఆండ్రాయిడ్, ఐవోఎస్ ప్లాట్ ఫామ్ లపై డిట్టో టీవీ అందుబాటులో ఉంచినట్టు జీ గ్రూపు ప్రకటించింది. డిట్టో టీవీ యాప్ ద్వారా ఎక్కడైనా, ఎప్పుడైనా టీవీ ప్రసారాలను చూసుకోవచ్చని కంపెనీ అంటోంది. మూడు నెలలకు రూ. 50, ఆరు నెలలకు రూ.90, ఏడాది చందా రూ.170గా ప్రకటించింది.

భాస్కర్