ఢిల్లీలో మహిళా వ్యాపారిపై అత్యాచారం.. మత్తుమందిచ్చి రేప్

Posted: 04/02/2016 02:37 PM IST

దేశరాజధాని ఢిల్లీలో మహిళలకు భధ్రత కరువైందని, నిర్భయ ఘటనకు ముందు తరువాత చూసుకుంటే.. నిర్భయ ఘటన తరువాతే మహిళలపై అకృత్యాలు మరింతగా పెరిగిపోయాయని ఇటీవలే ఓ సర్వే వెల్లడించిన అక్షర సత్యాలు అకళింపు చేసుకోవడానికి కఠినంగానే అనిపించినా ఇవి వాస్తవాలు. ఎవరో గుర్తు తెలియని మృగాళ్లు ఉద్రేక స్థితిలో మహిళలపై తెగబడుతున్నారనుకుంటే పోరబాటే. నేరం చేయాలని ముందుగానే ప్రణాళికలు రచించుకుని అత్యాచారాలకు తెగబడుతున్న వారి సంఖ్యే అధికంగా వుంది.

తాజాగా ఢిల్లీలో మరో అత్యాచార ఘటన వెలుగు చూసింది. ఓ మహిళా వ్యాపారవేత్తపై మరో కామాంధ వ్యాపారవేత్త అత్యాచారం పాల్పడ్డాడు. శుక్రవారం కనాట్ ప్లేస్లోని ఓ హోటల్లో ఈ దారుణం జరిగింది. బాధితురాలి ఫిర్యాదు మేరకు వివరాలిలా ఉన్నాయి. దక్షిణ ఢిల్లీలోని డిఫెన్స్ కాలనీకి చెందిన బాధిత మహిళ వ్యాపారవేత్త సొంతంగా వ్యాపారం నిర్వహిస్తోంది. బిజినెస్ వ్యవహారాలపై చర్చించేందుకు ఛత్తీస్గఢ్కు చెందిన మరో వ్యాపారవేత్త ఆమెను హోటల్కు లంచ్కు ఆహ్వానించారు.

అయితే ఇద్దరికీ గతంలో పరిచయం ఉండటంతో ఆమె ఒక్కరే అక్కడికి వెళ్లారు. కాగా నిందితుడు అమెపై కన్ను వేసిన విషయాన్ని అమె గ్రహించలేకపోయింది. ముందుగా వేసుకున్న ప్రణాళికలో భాగంగా ఆమెకు మత్తుమందు కలిపిన డ్రింక్ ఇచ్చి అపస్మారక స్థితిలోకి వెళ్లాక హోటల్లోని రూమ్కు తీసుకెళ్లి అత్యాచారం చేశాడు. బాధితురాలు స్పృహలోకి వచ్చాక పోలీసులకు ఫోన్ చేసి ఫిర్యాదు చేసింది. అప్పటికే నిందితుడు అక్కడ నుంచి వెళ్లిపోయాడు. పోలీసులు కేసు నమోదు చేసుకుని నిందితుడి కోసం గాలిస్తున్నారు. చండీగడ్ కు వెళ్లిన పోలీసులు నిందితుడిని అదుపులోకి తీసుకున్నారు.

మనోహర్