అదే ఇంట్లో రెండోసారీ చోరీ.. అందుకు ‘దొంగ సారీ’

Posted: 11/27/2015 11:09 AM IST

Thief commits theft in the same house for second time and says sorry

ఆ ఇ:టికి కన్నెం వేసేందుకు కలసి వచ్చినట్లు వుంది అందుకే ఆ దొంగ ఏకంగా నెల రోజుల వ్యవధిలో రెండు పర్యాయాలు దొంగతనానికి పాల్పడ్డారు. మొదటిసారి దొంగతనం చేసినప్పుడే మళ్లీ చేయాలనుకుని నిర్ణయించుకున్నాడో ఏమో తెలియదు కానీ.. ఒకసారి దొంగతనం చేసిన ఇంటికే మళ్లీ కన్నం వేసి.. తన పశ్చాతాపాన్ని వెలిబుచ్చాడు. అదెలా అంటారా..? ‘సారీ’ అంటూ గోడపై రాసి మరీ ఇంట్లో ఉన్నదంతా ఊడ్చుకెళ్లాడు.

వివరాల్లోకి వెళ్తే.. బంజారాహిల్స్ రోడ్ నం. 14లోని బీఎన్‌రెడ్డి కాలనీ ప్లాట్ నెం.36లో వ్యాపారి ప్రదీప్ రంగనాథన్ దంపతులు ఉంటున్నారు. గతనెల 31న వీరింట్లో దొంగ చొరబడి... బీరువాలో ఉన్న అమెరికన్ డాలర్లు, బంగారు ఆభరణాలు, కెమెరాలు, ఐఫోన్లు దోచుకెళ్లాడు. గోడపై ‘సారీ’ అంటూ రాసి ఉడాయించాడు. బాధితుడి ప్రదీఫ్ రంగనాథన్ ఫిర్యాదుతో రంగంలోకి దిగిన పోలీసులు కేసు నమోదు చేసుకుని దర్యాప్తు చేస్తున్నారు.

ఈ క్రమంలోనే... బుధవారం రాత్రి అదే దొంగ మళ్లీ అదే ఇంట్లోకి ప్రవేశించాడు. విలువైన ఆభరణాలతో పాటు రూ.6 వేల నగదు ఎత్తుకెళ్లాడు. సరిగ్గా మొదటిసారి రాసిన చోటే మరోసారి ‘సారీ’ అంటూ రాసి పరారయ్యాడు. బాధితుడి ఫిర్యాదుతో రంగంలోకి దిగిన క్రైమ్ పోలీసులు, క్లూస్ టీం సంఘటనా స్థలంలో వేలిముద్రలను సరిచూడగా రెండుసార్లు వచ్చిందీ ఒకే దొంగని తేలింది. ఒకసారి దొంగలించిన ఇంటిలో మరోసారి దొంగతనానికి పాల్పడి ఇంటి యజమానికి సవాల్ విసురుతున్నాడా..? లేక స్థానిక పోలీసులకు దొంగ సవాల్ విసురుతున్నాడా అన్నది మాత్రం అర్థంకాకుండా వుంది. త్వరలోనే దొంగను పట్టుకుంటామని పోలీసులు చెబుతున్నారు. అప్పుడు కానీ దొంగ ఎవరో.. పశ్చాతపం ఎందుకో అన్నవిషయాలు వెలుగులోకి రావు.

జి. మనోహర్