బహుపరాక్.. బహుపరాక్.. ! ట్రాయ్ నిర్ణయం బహుపరాక్..!! కాల్ కట్ అయితే రూపాయి వచ్చే..!!!

Posted: 10/16/2015 01:51 PM IST

Compensate for call drops from jan 1 2016 trai to telcos

సెల్ ఫోన్ వినియోగదారులకు భారత్ టెలికామ్ రెగ్యూలేటరీ అథారిటీ (ట్రాయ్) శుభవార్తనందించింది నగర, పట్టణ శివారు ప్రాంతాల్లోకి నాణ్యత కొరవైన సర్వీసులను అందిస్తూ.. మోబైల్ ఫోన్ వినియోగదారుల జేబులకు చిల్లులు పడేలా చేస్తున్న టెలికామ్ కంపెనీలపై కోరడా ఝుళిపించింది. ఇకపై మోబైల్ ఫోన్ వినియోగదారులకు కాల్ డ్రాప్ ల నుంచి ఊరట కల్పించే నిర్ణయం తీసుకుంది. 'కాల్ డ్రాప్స్'కు పరిహారం చెల్లించాలని టెలికాం ఆపరేటర్లను ట్రాయ్ ఆదేశించింది. ప్రతి కాల్ డ్రాప్ కు రూపాయి చొప్పున చెల్లించాలని.. ఇది 2016, జనవరి 1 నుంచి అమల్లోకి వస్తుందని ప్రకటించింది.

దేశంలోని అన్ని ప్రాంతాలకు ఇంకా నాణ్యతాయుతమైన సేవలను అందించలేని పక్షంలో ఆయా సర్వీసు దారులకు రెండు లక్షల రూపాయల వరకు పెనాల్టీ విధించే దిశగా ట్రాయ్ అదేశాలు జారీ చేసింది. రోజులో మూడుసార్లు మాత్రమే ఈ పరిహారం అందుతుందని తెలిపింది. ఫోన్ లో మాట్లాడుతుండగా మధ్యలో కట్ అయితే నాలుగు గంటల్లోగా పరిహారం అందించాలని సూచించింది. పరిహారం అందించిన విషయాన్ని వినియోగదారుడి ఎస్ఎంఎస్ లేదా యూఎస్ఎస్డీ ద్వారా వినియోగదారులకు తెలపాలని ఆదేశించింది. పోస్ట్ పెయిడ్ కస్టమర్లకు తర్వాత నెల బిల్లులో వివరాలు పేర్కొనాలని సలహాయిచ్చింది. తాము వెలువరించిన ఆదేశాలను టెలికం ఆపరేటర్లు ఏమేరకు పాటిస్తున్నారనే విషయాన్ని నిశితంగా పరిశీలిస్తుంటామని తెలిపింది. కాల్ డ్రాప్స్ సమస్య పరిష్కారం అయ్యేందుకు సర్వీసు ప్రొవైడర్లు ప్రయత్నించాలని సూచించింది. దీనిపై ఆరునెలల తర్వాత మరోమారు సమీక్ష నిర్వహిస్తామని ట్రాయ్ తెలిపింది.

జి. మనోహర్