ITEMVIDEOS: రిషితేశ్వరి కేసు నిందితులకు కండిషనల్ బెయిల్

Posted: 10/01/2015 07:14 PM IST

ఆచార్య నాగార్జున యూనివర్సిటీ మొదటి సంవత్సరం ఆర్కిటెక్చర్ విద్యార్థి ఎం.రిషితేశ్వరి ఆత్మహత్య కేసులో రిమాండ్ ఖైదీలుగా వున్న ముగ్గురు నిందితులకు ఎట్టకేలకు బెయిల్ లభించింది. ర్యాగింగ్ పేరుతో అమెకు నరకయాతన చూపారని.. వాటిని భరించలేక చివరకు బాధితురాలు అసువులు బాసిందన్న అభియోగాలతో అరెస్టు అయిన ముగ్గురు నిందితులు.. తమకు బెయిల్ ఇవ్వాల్సిందిగా కోరుతూ న్యాయస్థానంలో దాఖలు చేసుకున్న బెయిల్ పిటిషన్పై వాదనలు విన్న న్యాయస్థానం వారికి బెయిల్ మంజూరు చేసింది.

గుంటూరు జిల్లా 1వ అదనపు జిల్లా సెషన్స్ కోర్టు గురువారం నిందితులకు షరతులతో కూడిన బెయిల్ మంజూరు చేసింది. ఈ కేసులో దుంప హనీషా, జయచరణ్, నరాల శ్రీనివాస్ నిందితులుగా ఉన్న విషయం విదితమే.  A1గా సీనియర్ విద్యార్థిని హనీషా, A2గా జయచరణ్, A3గా శ్రీనివాస్గా ఉన్నారు. గతంలో వీరి బెయిల్ పిటిషన్ను కోర్టు పలుమార్లు తిరస్కరించిన విషయం తెలిసిందే. ఈ కేసులో వీరి రిమాండ్ ఖైదీలుగా శిక్షను అనుభవిస్తూన్న 77 రోజుల తర్వాత నిందితులకు కోర్టు బెయిల్ ఇచ్చింది.

జి. మనోహర్