టీడీపీ-టీఆర్ఎస్ కార్యకర్తల మధ్య ఘర్షణ.. ఎర్రబెల్లి సహా 15 మందికి గాయాలు

Posted: 09/27/2015 07:22 PM IST

Clash between trs and tdp activists in warangal

వరంగల్ జిల్లాలో అధికార టీఆర్ఎస్ పార్టీకీ, తెలుగుదేశం పార్టీ కార్యకర్తలకు మధ్య గత కొంత కాలంగా నిగూఢంగా వున్న యుద్దవాతావరణం ఇవాళ వారి మధ్య ఘర్షణకు దారితీసింది. జిల్లాలోని పాలపర్తి మార్కెట్ యార్డు వద్ద ఈ ఘర్షణ వాతావరణం ఉద్రిక్తలకు దారి తీసింది. మార్కెట్ యార్టులోని ఓ భవనం శంకుస్థాపన విషయంలో రేగిన వివాదమే ఘర్షణకు దారితీసింది. మార్కెట్ యార్డుకు టీటీడీఎల్పీనేత ఎర్రబెల్లి దయాకర్ రావు రాగానే ఆయనకు వ్యతిరేకంగా టీఆర్‌ఎస్‌ కార్యకర్తలు నినాదాలు చేయడం వారిని ప్రతిఘటించడానికి టీడీపీ కార్యకర్తాలు పోటీగా నినాదాలు చేయడంతో ఇరుపార్టీ కార్యకర్తల తోపులాట.. ఆ తరువాత ఘర్షణ చోటుచేసుకుంది. ఈ దాడిలో ఎర్రబెల్లి చేతికి గాయమైంది. పాలపర్తి ఎస్ఐ సహా 15 మందికి గాయాలయ్యాయి. క్షతగాత్రులను పోలీసులు చికిత్స నిమిత్తం ఆసుపత్రికి తరలించారు.

ఆదివారం జిల్లాలోని పాలకుర్తి మార్కెట్ యార్డులో అదనపు గదుల ప్రారంభోత్సవానికి ఎర్రబెల్లి దయాకర్ రావు హాజరయ్యారు. ఈ సందర్భంగా టీఆర్ఎస్ కార్యకర్తలు ఎర్రబెల్లిని అడ్డుకున్నారు. దీంతో టీఆర్ఎస్, టీడీపీ కార్యకర్తలు ఘర్షణకు దిగారు. పరస్పరం రాళ్లు రువ్వుకున్నారు. ఈ ఘటనలో ఎర్రబెల్లి దయాకర్ రావుతో పాటు అక్కడ ఉన్న పోలీసులకు, మీడియా ప్రతినిధులకు గాయాలయ్యాయి. దీంతో రంగంలోకి దిగిన పోలీసులు లాఠీచార్జీ చేసి ఇరు వర్గాలను చెదరగొట్టారు. పరిస్థితిని అదుపులోకి తీసుకువచ్చేందుకు గాను ఎర్రబెల్లిని కూడా పోలీసులు అదుపులోకి తీసుకున్నారు. కాగా, టీఆర్ఎస్ దాడిని నిరసిస్తూ టీడీపీ కార్యకర్తలు ఆందోళనకు దిగారు. రోడ్డుపై బైఠాయించి రాస్తారోకో నిర్వహించారు. దీంతో వాహనాల రాకపోకలు నిలిచిపోయాయి.

జి. మనోహర్