అడ్డంగా వాడుకుంటున్నారని వార్నింగ్ ఇచ్చిన సల్మాన్

Posted: 09/23/2015 11:51 AM IST

సామాజిక మాధ్యమం అయిన ‘ఫేస్ బుక్’ ఈమధ్య ‘ఫేక్’ అకౌంట్ల రాద్ధాంతం తారాస్థాయికి చేరిపోతోంది. తమ అభిమాన తారల పేరుతో నకిలీ పేజీలు క్రియేట్ చేయడం, వాళ్లతో దిగిన ఫోటోలను తమకిష్టం వచ్చినట్లుగా వాడుకోవడం లాంటివి చేస్తున్నారు. అంతేకాదు.. ఇతర హీరోల ఫోటోలతో పోల్చుతూ సెటైర్లు వేయడం మరీ ఎక్కువైంది. ఇక కొంతమంది హేటర్స్ అయితే హీరోల ఫోటోలకు జంతువులకు అటాచ్ చేసి పేరడీలు క్రియేట్ చేస్తున్నారు. నెటిజన్లు కూడా ఈ విధమైన సంస్కృతికి బాగా అట్రాక్ట్ కావడంతో ‘ఫేక్’గాళ్లు మరింత రెచ్చిపోతున్నారు. ఇలా ఈ విధంగా ‘ఫేక్’ అకౌంట్ల బారిన పడిన తారలు ఎందరో వుండగా.. తాజాగా సల్మాన్ ఖాన్ కూడా చేరిపోయాడు.

‘ఫేస్ బుక్’లో సల్మాన్ పేరిట ఎన్నో ఫేక్ పేజీలు క్రియేట్ చేయబడి వున్నాయి. ఆయా పేజీల్లో సల్మాన్ ఫోటోలను తమకిష్టమొచ్చినట్లుగా అభిమానులు వాడుకుంటున్నారు. మరొక ‘ఫేక్’ ఘనుడు అందరికంటే ఓ అడుగు ముందుకేసి.. సల్మాన్ త్వరలోనే ఓ సినిమాకి సంబంధించి కాస్టింగ్ చేయనున్నాడని పోస్ట్ చేశాడు. ఈ విషయాన్ని ఎలోగోలా తెలుసుకున్న సల్మాన్ ఆగ్రహం వ్యక్తం చేశాడు. సామాజిక మాధ్యమంలో తన పేరిట్ ఎవరో ఫేక్ అకౌంట్ క్రియేట్ చేశారని, తన ఫోటోలను దుర్వినియోగం పరుస్తున్నారని, ఇలా చేయడం తగదని సల్మాన్ వార్నింగ్ ఇచ్చాడు. అలాగే.. త్వరలోనే తాను సినిమాలో నటిస్తున్నానని, అందుకు సంబంధించి కాస్టింగ్ నిర్వహిస్తున్నట్లుగా పేర్కొనబడిన విషయంలో ఏమాత్రం వాస్తవం లేదని స్పష్టం చేశాడు.

‘నేను ఓ సినిమాలో నటిస్తున్నానని, ఆ ప్రాజెక్ట్ కోసం కాస్టింగ్ నిర్వహిస్తున్నానని ఓ నకిలీ ఫేస్బుక్ పేజీలో రాశారు. అయితే.. తాను గానీ, తన మేనేజర్లు గానీ ఎలాంటి కొత్త ప్రాజెక్టుకు ఆమోదం తెలపలేదు. ఇక కొంతమంది నాతో కలిసి దిగిన ఫొటోలను దుర్వినియోగం చేస్తున్నారు. ఇది ఏమాత్రం సరికాదు.. నాకు ఆమోదయోగ్యం కాదు’ అని బుధవారం ఉదయం సల్లూ భాయ్ ట్వీట్ చేశాడు.