ఇకపై రాజమండ్రి మళ్లీ రాజమహేంద్రవరంగా మారనుంది..

Posted: 07/26/2015 11:57 AM IST

ఆంధ్రప్రదేశ్‌ ముఖ్యమంత్రి చంద్రబాబు నాయుడు ఆదివారం ఉదయం రాజమండ్రిలో గోదావరి మహా పుష్కర వనం పైలాన్‌ను ఆవిష్కరించారు. దివాన్‌ చెరువు దగ్గర పుష్కర వనానికి ఆయన శంకుస్థాపన చేశారు. ఈ సందర్భంగా నీరు-చెట్టు కార్యక్రమాన్ని ఆయన ప్రారంభించారు. రాష్ట్ర వ్యాప్తంగా ఉన్న అడవులను అభివృద్ధి చేసుకోవడం, అలాగే అడవుల బయట విస్తీర్ణాన్ని పెంచుకోవడం లాంటివి నీరు-చెట్టు కార్యక్రమంలో భాగంగా ఉన్నాయని ఆయన అన్నారు.  రాజమండ్రి పేరును 'రాజమహేంద్రవరం'గా మారుస్తున్నట్లు ఆయన ప్రకటించారు. నిజానికి గతంలో ఈ పేరే ఉండేదని, కానీ, బ్రిటీష్ పాలకులు తమ ఉచ్ఛారణకు అనువుగా రాజమండ్రిగా పేరు మార్చారని గుర్తుచేశారు.

కాగా ఇపుడు మళ్లీ రాజమహేంద్రవరం పేరునే పునరిద్దరించి, నామకరణం చేయనున్నట్లు తెలిపారు. రాజమహేంద్రవరం నగరాన్ని రాష్ట్రానికి సాంస్కృతిక రాజధానిగా అభివృద్ధి చేస్తామన్నారు. ఈ అభివృద్ధిలో భాగంగా ధవళేశ్వరం బ్యారేజీ చుట్టూ 35 కిలోమీటర్ల ప్రాంతాన్ని అఖండ గోదావరి ప్రాజెక్టుతో అభివృద్ధి చేస్తామని, ఇందుకోసం రూ.100 కోట్లను కేటాయిస్తున్నట్టు తెలిపారు. ఈ సందర్భంగా ఏర్పాటు చేసిన ఎగ్జిబిషన్‌ను చంద్రబాబు తిలకించారు. ఈ కార్యక్రమంలో చంద్రబాబుతో పాటు రాజమండ్రి ఎంపీ మురళీమోహన్‌ రాష్ట్ర మంత్రులు యనమల రామకృష్ణుడు తదితరులు పాల్గొన్నారు.

జి. మనోహర్