జనసేన కార్యకర్తల ఆందోళన

Posted: 06/06/2015 12:21 PM IST

ప్రముఖ నటుడు పవన్ కళ్యాణ్ స్థాపించిన జనసేన పార్టీ కార్యకర్తలు ప్రత్యేక హోదాపై గళమెత్తారు. గతంలో రైతుల నుండి బలవంతంగా భూములను లాక్కోవడానికి తాను ఒప్పుకోను అని ఖరాకండిగా చెప్పిన పవన్ కళ్యాణ్ గత కొంతకాలంగా సైలెంట్ గా ఉన్నారు. తాజాగా జనసేన కార్యకర్తలు ఏపికి ప్రత్యేక హోదా కల్పించాలని ధర్నా నిర్వహించారు. దాంతో  చాలా కాలం తర్వాత జనసేన పార్టీ వార్తల్లోకెక్కింది. అయితే ఏపి రాజధాని నిర్మాణం పూజ జరుగుతున్న నేడే జనసేన పార్టీ కార్యకర్తలు ఆందోళనకు దిగడం చర్చనీయాంశంగా మారింది. ఏపికి ప్రత్యేక హోదా డిమాండ్ చేస్తూ ఆ పార్టీ కార్యకర్తలు విజయవాడలోని కాళేశ్వరరావు మార్కెట్ వద్ద ధర్నా నిర్వహించారు. ప్రత్యేక హోదా విషయంలో కేంద్ర మంత్రి ఎం వెంకయ్యనాయుడు నమ్మి మోసం చేశారని జనసేన కార్యకర్తలు మండిపడ్డారు.

ముందు నుండి రైతుల పక్షాల పోరాటం చేస్తున్న జనసేన పార్టీ తాజాగా ఏపికి ప్రత్యేక హోదా కల్పించడంలో జరుగుతున్న జాప్యాన్ని ప్రశ్నించింది. రాష్ట్రానికి చెందిన బీజేపీ, టీడీపీలకు చెందిన కేంద్రమంత్రులు వెంటనే తమ పదవులకు రాజీనామా చేయాలని వారు డిమాండ్ చేశారు. రాష్ట్రానికి ప్రత్యేక హోదా ఇవ్వకుంటే ఆంధ్రప్రదేశ్ తీవ్రంగా నష్టపోతుందని కార్యకర్తలు ఆవేదన వ్యక్తం చేశారు. పవన్ కల్యాణ్ స్ఫూర్తి, ఆయన ప్రేరణతోనే ఈ ధర్నాకు దిగినట్లు జనసేన కార్యకర్తలు వెల్లడించారు. అయితే తాము చేస్తున్న పోరాటం రాష్ట్రానికి ప్రత్యేక హోదా కల్పించడం కోసమే అని, ఎవరికి వ్యతిరేకంగ కాదు అని జనసేన కార్యకర్తలు వెల్లడించారు. మరి గతంలో ఎన్నికల సమయంలో పవన్ తో చెలిమి చేసిన నరేంద్ర మోదీ స్పందించి ఏపికి ప్రత్యేక హొదాపై ఏదైనా ప్రకటన చేస్తారేమో చూడాలి.

*అభినవచారి*