సల్మాన్ పై అభిమానమే అలాచేయించింది.. క్షమించండీ

Posted: 05/09/2015 06:22 PM IST

బాలీవుడ్ ప్రముఖ నటుడు, కండల వీరుడు సల్మాన్ ఖాన్ హిట్ అండ్ రన్ కేసులో ముంబై సెషన్స్ కోర్టు ఐదేళ్ల శిక్షను ఖరారు చేస్తూ తీర్పును వెలువరించడంతో బాధతప్త హృదయుడినై చవకబారు వ్యాఖ్యలు చేశానని బాలీవుడ్ గాయకుడు అభిజిత్ అన్నారు. సల్మాన్ ఖాన్ పై వున్న అభిమానంతోనే తానా వ్యాఖ్యలను చేశానని, ఎవరినీ ఉద్దేశించి కాదన్నారు. తన వ్యాఖ్యలు వివాదాస్పదం కావడం.. వాటిపై తీవ్ర విమర్శలు వెల్లువెత్తడంతో నాలుక కరుచుకన్న ఆయన.. ఎట్టకేలకు దిగివచ్చి.. క్షమాపణలు చెప్పారు.

‘‘రోడ్లమీద పడుకునేది కుక్కలు తప్ప మనుషులు కాదు... అలా పడుకునే వారు కుక్కచావే చస్తారు. ఇళ్లు లేనంత మాత్రాన రోడ్లమీద పడుకోకూడదు’’ అంటూ అభిజిత్‌ ట్వీట్‌ చేసిన విషయం తెలిసిందే. ఆ వాఖ్యలపై దేశ వ్యాప్తంగా దుమారం రేగింది. అభిజిత్‌ వ్యాఖ్యలపై కేసు కూడా నమోదు అయింది. దాంతో అభిజిత్‌ వెనక్కి తగ్గారు. తన వ్యాఖ్యల్లో పరుషపదాలు ఉపయోగించినందుకు క్షమాపణ చెప్పారు. సల్మాన్‌ ఖాన్‌ దృష్టిలో పడడం కోసం అలాంటి వ్యాఖ్యలు చేయలేదని ఆయన స్పష్టం చేశారు.

ఆయనపై వున్న అభిమానం అలా చేయిందని చెప్పారు. అయితే తాను సల్మాన్‌పై దొంగ ప్రేమ చూపిస్తున్న వారికి, హై-ఫై మనుషులకి, మేడం డే వంటి రచయితలకు... కపూర్‌ వంటి నటులకు క్షమపణ చెప్పడం లేదని, వాళ్లందరూ మోసగాళ్లని, వాళ్లు ఏమీ చేయరని, మొసలి కన్నీళ్లు మాత్రం కారుస్తారని విమర్శించారు.

జి.మనోహర్