‘అరె.. నేనేమీ చేయలేదని చెబితే వినిపించుకోరే!’

Posted: 04/30/2015 12:42 PM IST

బొగ్గు క్షేత్రాల కేటాయింపుల్లో దర్శకరత్న దాసరి నారాయణరావు కూడా అవినీతికి పాల్పడ్డారంటూ గతకొన్నాళ్ల నుంచి వార్తలు చక్కర్లు కొడుతున్న విషయం తెలిసిందే! అయితే.. ఆ వార్తలను ఆయన ముందునుంచి తోసిపుచ్చుతూ వచ్చారు కానీ.. చివరికీ ఈ స్కాం కేసులో కేంద్ర దర్యాప్తు సంస్థ తాజాగా దాఖలు చేసిన చార్జ్ షీటులో ఈయన పేరును కూడా పేర్కొంది. ఈ స్కాంలో దాసరి కూడా అవినీతికి పాల్పడ్డారంటూ ఆ సంస్థ తేల్చి చెప్పేసింది. దీంతో ఖంగుతిన్న దాసరి.. తాను ఏ విధమైన అవినీతికి పాల్పడలేదంటూ మరోసారి మొరపెట్టుకుంటున్నారు.

కేంద్ర బొగ్గుశాఖ సహాయమంత్రిగా వున్నప్పుడు క్షేత్రాల కేటాయింపుల్లో తాను ఎలాంటి అవినీతికి పాల్పడలేదని దాసరి అన్నారు. ఎవరి నుంచి కూడా తాను సెంటు భూమి కూడా తీసుకోలేదని, ఎవరి నుంచి ఏ విధమైన లాభం పొందలేదని ఆయన చెప్పారు. రాజకీయాల్లో వివాదం సహజమేనని దాసరి పేర్కొన్నారు. ఇదిలావుండగా.. గతనెలలో దాసరికి చెందిన సౌభాగ్య మీడియాలో రూ.2.25 కోట్ల ఆస్తులను ఈడీ జప్తు చేసిన విషయం తెలిసిందే! అప్పుడు కూడా ఈ విధంగానే ఆ కేసుతో తనకు సంబంధం లేదని స్పందించారు. మరి ఈ ‘బొగ్గు’ మసి దాసరిని మరెన్ని కష్టాల్లో ముంచుతుందో వేచి చూడాల్సిందే!