‘అనంత’ విషాదం పట్ల రాజకీయ ప్రముఖుల దిగ్ర్భాంతి

Posted: 01/07/2015 02:22 PM IST

Political leaders express thier condolence on anathapur bus accident tragedy

అనంత లో జరిగిన ఘోర ప్రమాద ఘటనపై కేంద్ర మాజీ మంత్రి, రాజ్యసభ సభ్యుడు చిరంజీవి హైదరాబాద్లో తీవ్ర దిగ్భ్రాంతి వ్యక్తం చేశారు. మృతి చెందిన కుటుంబాలకు ఆయన ప్రగాఢ సానుభూతి తెలిపారు. ప్రమాదంలో మృతి చెందిన ఒక్కొక్కరికి రూ. 15 లక్షల ఎక్స్గ్రేషియా చెల్లించాలని ఆయన ప్రభుత్వాన్ని డిమాండ్ చేశారు. ఘోర ప్రమాదం చోటుచేసుకున్న మడకశిర మండలంలోని ప్రమాదఘటనాస్థలికి ఏపీసీసీ చీఫ్ రఘవీరా రెడ్డి బయలుదేరి వెళ్లారు. సంఘటనపై ఆయన దిగ్భాంతి వ్యక్తం చేశారు. ప్రమాదానికి కారణాలను స్థానికులను అడిగి తెలుసుకున్నారు. అనంతరం మృతుల బాధితులను సానుభూతి వ్యక్తం చేశారు. ఈ ఘటనలో తీవ్రంగా గాయపడి ఆస్పత్రిలో చికిత్స పోందుతున్న క్షతగాత్రులను ఆయన పరామర్శించారు.

ఈ ప్రమాద ఘటన తనను తీవ్రంగా కలచివేసిందని ప్రముఖ హీరో, హిందూపురం ఎమ్మెల్యే నందమూరి బాలకృష్ణ అన్నారు. బాధితులకు తక్షణం మెరుగైన వైద్యసేవలను అందించేందుకు ప్రభుత్వం అన్ని చర్యలు తీసుకుందని వివరించారు. అటు ఈ ప్రమాదంపై టీడీపీ పొలిట్ బ్యూరో సభ్యుడు హరికృష్ణ దిగ్భ్రాంతి వ్యక్తం చేశారు. ఈ ఘటనపై వైఎస్ఆర్ సీపీ అధ్యక్షుడు వైఎస్ జగన్ దిగ్ర్భాంతి వ్యక్తం చేశారు. ప్రమాద వార్త కలచి వేసిందని ఆయన అన్నారు. ప్రమాదంలో పిల్లలు సహా అనేక మంది చనిపోవడం తీవ్ర ఆవేదనకు గురి చేస్తోందన్నారు.

బాధిత కుటుంబాలను ప్రభుత్వం అన్ని రకాలుగా ఆదుకోవాలని వైఎస్ జగన్ డిమాండ్ చేశారు. గాయపడ్డ వారికి మెరుగైన వైద్య సేవలు అందించేందుకు ప్రభుత్వం చర్యలు తీసుకోవాలని ఆయన కోరారు. కాగా ఇవాళ మధ్యాహ్నం ఘటనా స్థలానికి ఆయన బయలుదేరి వెళ్లనున్నారు. మృతుల బంధువులకు సానుభూతి వ్యక్తం చేయడంతో పాటు క్షతగాత్రులను పరామర్శించనున్నారు. ఈ దుర్ఘటనపై ప్రభుత్వం విచారణ జరిపించాలని వైఎస్ జగన్ డిమాండ్ చేశారు. మరోవైపు ఉరవకొండ వైఎస్ఆర్ సీపీ ఎమ్మెల్యే వై.విశ్వేశ్వరరెడ్డి సంఘటనా స్థలానికి చేరుకుని, సహాయక చర్యలను పర్యవేక్షిస్తున్నారు.

జి.మనోహర్