మోదీ మాటలను సెన్సార్ చేసిన డిడి?

Posted: 05/01/2014 01:46 PM IST

ఏప్రిల్ 26 న రికార్డ్ చేసిన గుజరాత్ దూర్ దర్శన్ ఖాస్ ములాకాత్ కార్యక్రమంలో భారతీయ జనతా పార్టీ ప్రధానమంత్రి అభ్యర్థి నరేంద్ర మోదీతో జరిగిన ఇంటర్వ్యూలో కొంత భాగాన్ని తొలగించారని సోషల్ మీడియా కోడై కూస్తోంది.  పైగా అది ఏప్రిల్ 27 న ప్రసారమైంది.  అంత ఆలస్యమవటానికి కారణం అందులో కొన్ని పదాలను తొలగించటమే అంటున్నారు మోదీ అభిమానులు తమ ట్విట్టర్లలో.  

నిజానికి మోదీని గుజరాత్ దూర్ దర్శన్ మోదీ ని కొంతకాలంగా దూరంగా ఉంచిన నేపథ్యంలో ఉన్నట్టుండి ఆయనతో ఇంటర్వ్యూ అనేసరికి ఆశ్చర్యం కలిగిందని, అయితే అందులో ఆయన ప్రియాంక గాంధీ గురించి మాట్లాడిన మాటలను తొలగించారని అంటున్నారు.  ఆ తొలగించిన మాటలు ఇవి-

ప్రియాంక నాకు కూతురులాంటిదే కానీ ఆమె తల్లి సోనియాలా సోదరుడు రాహుల్ లా నాకు రాజకీయ ప్రత్యర్థి కాదు.  కూతుళ్ళను లక్ష్యం గా చేసుకుని మాట్లాడటం భారతీయ సంస్కృతి కాదు.

మోదీనుంచి విమర్శ వస్తుందనుకుని అడిగిన ప్రశ్నకు మోదీ పై విధంగా సమాధానం ఇవ్వటంతో దాన్ని తొలగించారని ఆయన అభిమానులు అంటున్నారు. 

అయితే ప్రసారభారతి సిఇఓ జవహర్ సర్కార్ మాత్రం ఇంటర్వ్యూలో ఏ భాగాన్ని ఎందుకు తొలగించారన్నది తనకి తెలియదని అన్నారు. 

-శ్రీజ