ప్లీజ్ ప్లీజ్ మా పిల్లలకీ మా వాళ్ళకీ టికెట్- కాంగ్రెస్ నేతలు

Posted: 03/26/2014 11:31 AM IST

సీమాంధ్రలో కాంగ్రెస్ పార్టీలో ఎన్నికలలో నిలబడటానికి అభ్యర్థులే కరువైతే, తెలంగాణాలో సీనియర్ నాయకులంతా వారి పిల్లలను కూడా రాజకీయ రంగంలో అరంగేట్రం చేయించటానికి ఇదే అదునని భావిస్తున్నట్లుగా కనిపిస్తున్నారు.  కొడుకులు, కూతుళ్ళు, భార్యలు, దగ్గర బంధువలకు కాంగ్రెస్ తరఫున ఎన్నికలలో పోటీ చెయ్యటానికి అవకాశం అడుగుతున్నారు. 

ఏప్రిల్ 30 న జరిగే ఎన్నికలలో 119 అసెంబ్లీ స్థానాలు, 17 పార్లమెంటు స్థానాలకు పోటీలో నిలబెట్టటానికి సీనియర్ నాయకులు సిఫారసులు చెయ్యటంతో పార్టీ సెంట్రల్ స్క్రీనింగ్ కమిటీకి ఒత్తిడి ఎక్కువైంది.  ఈ కింది నాయకులంతా ఆ పనిలో ఉన్నవారే.

తెలంగాణా పిసిసి అధ్యక్షుడు పొన్నాల లక్ష్మయ్య భోనగిరి తనకి, జనగాం తన కోడలు వైశాలికి అడుగుతున్నారు.  వర్కింగ్ కమిటీ ప్రెసిడెంట్ ఉత్తమ కుమార్ రెడ్డి తన భార్య పద్మా రెడ్డికి కోదాడ అడుగుతున్నారు.  దామోదర రాజ నర్సింహ భార్య పద్మిని రెడ్డికి సంగారెడ్డి కావాలంటున్నారు.  మాజీ పిసిసి అధ్యక్షుడు డి శ్రీనివాస్ తనకి నిజామాబాద్ అర్బన్, తన కుమారుడు సంజయ్ కి నిజామాబాద్ రూరల్ కావాలంటున్నారు.  మాజీ మంత్రి జానారెడ్డి తన కుమారుడు రఘు రెడ్డి కోసం మిర్యాలగూడ అసెంబ్లీ సీట్ కోరుతున్నారు.  మాజీ హోం మంత్రి సబితా రెడ్డి కుమారుడు కార్తిక్ రెడ్డి చేవెళ్ళ పార్లమెంట్ స్థానం కావాలంటున్నారు. 

ఇంకా, మాజీ మంత్రులు దామోదర రెడ్డి, ముఖేశ్ గౌడ్, గీతా రెడ్డి, శంకరరావు, రత్నాకర రావులు కూడా తమ పిల్లలకు కాంగ్రెస్ టికెట్ అడుగుతున్నారు. 

ఈ విధంగా 40 మంది సీనియర్ నాయకులు తమ పిల్లలు, భార్యలు, దగ్గర బంధువుల కోసం కాంగ్రెస్ పార్టీ టికెట్ అడుగుతున్నారని, ఈ సంఖ్య రోజురోజుకీ పెరిగిపోతున్నదని సీనియర్ నాయకులంటున్నారు. 

-శ్రీజ