పవన్ కళ్యాణ్ రెండవ విడత ప్రకటనలు మార్చి 27న

Posted: 03/24/2014 10:57 AM IST

Pawan kalyan second public meet on 27 march

మార్చి 14న పవన్ కళ్యాణ్ హైద్రాబాద్ హైటెక్స్ లో జనసేన పార్టీ ఆవిర్భావాన్ని బహిరంగంగా ప్రకటించారు. అందులో కాంగ్రెస్ కి వ్యతిరేక నినాదాలు చేసారు. ఆ తర్వాత భారతీయ జనతా పార్టీ ప్రధానమంత్రి అభ్యర్థి నరేంద్ర మోదీతో భేటీ అయ్యారు.

ఇక తను మొదటి సభలో, మరోసారి కలుస్తానని, ఇంకా వివరాలు ఇస్తానని చెప్పిన ప్రకారమే, మోదీతో భేటీని మిగిలిన పార్టీలు తమకు అనుకూలంగా పవన్ కళ్యాణ్ కి వ్యతిరేకంగా ఉపయోగించుకోక ముందే, మరో సారి పవన్ కళ్యాణ్ తన మనసులోని మాటలను మార్చి 27న బహిర్గతం చెయ్యనున్నారు.

ఈసారి వేదిక విశాఖపట్నం ఇందిరా ప్రియదర్శిని ఆడిటోరియమ్. అందులో ప్రత్యేకంగా యువతను ఆకర్షించేవిధంగా పవన్ కళ్యాణ్ ప్రసంగంతో పాటు పాట కూడా తయారవుతోంది. ఈ సారి కూడా పవన్ వేదిక మీద ఒంటిరిగానే ప్రసంగిస్తూ తన ఉద్దేశ్యాలను వెల్లడిచేయబోతున్నారు.

మొదటిసారి చేసిన జనసేన ఆవిర్భావ సభలో ఎన్నికల విషయంలోనూ, పోటీ చేసే విషయంలోనూ ఇంకా తను ఒక నిర్ణయానికి రాలేదని, అయితే తను పదవిని మాత్రం ఆశించటం లేదని, కాంగ్రెస్ ని పడగొట్టటమే తన ధ్యేయమని ప్రకటించారు. అలా కాంగ్రెస్ ని ఓడించే పార్టీలకు తన మద్దతుంటుందని కూడా ఆయన స్పష్టం చేసారు.

ఇప్పటికే కొన్ని టివి ఛానెల్స్ పవన్ మోదీని కలవటం మీద దుమారం లేపాయి. మోదీని కలవటం కోసమే పార్టీ పెట్టాలా, ఒక జాతీయ పార్టీలో కలవటానికి అంత హడావిడి, ఆవేదన వ్యక్తం చేస్తూ ఉద్వేగంతో ప్రసంగించాలా అంటూ విమర్శలను గుప్పించాయి.

ఇలాంటి నిందలకు స్వస్థి వాక్యాలు పలుకుతూ, తన మనసులోని మాటలు, తన భవిష్యత్ కార్యాచరణను విస్పష్టంగా తెలియజేయటానికే పవన్ కళ్యాణ్ రెండవ సభను నిర్వహిస్తున్నారని తెలుస్తోంది.

-శ్రీజ