ముఖ్యమంత్రి పదవిని ఆశిస్తున్న కెసిఆర్?

Posted: 03/15/2014 03:02 PM IST

అఖిలభారత కాంగ్రెస్ పార్టీ ఛీఫ్ సెక్రటరీ దిగ్విజయ్ సింగ్ శుక్రవారం చేసిన మీడియా సమావేశంలో కాకుండా దాని తర్వాత మీడియా ప్రతినిధులతో చేసిన పిచ్చాపాటీ సంభాషణలో కెసిఆర్ ముఖ్యమంత్రి పదవిని ఆశిస్తున్నారనే సంకేతాలిచ్చారు.  

ఒకవేళ తెలంగాణా రాష్ట్ర సమితిని కాంగ్రెస్ లో విలీనం చెయ్యవలసివస్తే తెరాస అధ్యక్షుడు కె చంద్రశేఖర రావు తనకి ముఖ్యమంత్రి పదవి కావాలని కోరుతున్నట్లుగా తెలుస్తోంది.  విభజన బిల్లు లోని అంశాలతో విభేదించటం వలన కెసిఆర్ కాంగ్రెస్ కి దూరమయ్యారా అని అడిగిన ప్రశ్నకు దిగ్విజయ్ సింగ్, అలాంటిదేమీ లేదని, విభజన బిల్లులోని అన్ని అంశాలతోనూ ఆయన పూర్తిగా ఏకీభవించారని ఆయన అన్నారు.

అయితే ఈ విషయాన్ని కెసిఆర్ అధిష్టానం దగ్గర వెల్లడి చెయ్యలేదన్న విషయాన్ని కూడా దిగ్విజయ్ సింగ్ అంతకు ముందు అన్నారు.  

అయితే ఇప్పుడున్న పరిస్థితుల్లో మళ్ళీ కాంగ్రెస్ లో విలీనం చేస్తానని అనటానికి తెరాసకు కారణాలు వెతుక్కోవటం కూడా కష్టమౌతుంది.  కెసిఆర్ కి ముఖ్యమంత్రి పదవినస్తానన్నారని, అందుకే విలీనం చేస్తున్నామనైతే చెప్పలేరు కదా.  

తెరాస వస్తే కెసిఆర్ కి ఎలాగ వచ్చేది ముఖ్యమంత్రి పదవే.  దాన్ని ఆయనకు మరే పార్టీ ఇవ్వనక్కర్లేదు.  కానీ భాజపా, కాంగ్రెస్, తెదేపాలు, మధ్యలో పవన్ కళ్యాణ్ ఎంట్రీతో ఏమవుతుందో అన్న భయం ఉండటం సహజం.  ఫలితాలు వచ్చేంతవరకూ ఎన్నికలలో ఏం జరుగుతుందన్నది చెప్పటం కష్టం.  అందువలన కచ్చితంగా ముఖ్యమంత్రి పదవి వస్తుందంటే కాంగ్రెస్ లో చేరటమా లేకపోతే తెలంగాణాలో ఇంకా బలం పెంచుకుని ముఖ్యమంత్రి పదవిని తానే సంపాదించుకోవటమా అన్నది కెసిఆర్ ఆలోచించవలసివస్తుంది.  

కాంగ్రెస్ లో విలీనం చేస్తే కెసిఆర్ కి ముఖ్యమంత్రి పదవి ఒకవేళ లభించినా పార్టీని నమ్ముకునివున్న మిగతా నాయకుల సంగతి ప్రశ్నార్థకంగానే మిగిలిపోతుంది.  ఎందుకంటే కాంగ్రెస్ పార్టీకి ఆ పార్టీ సీనియర్ నాయకులకు చోటు కల్పించటం కూడా తప్పనిసరే.  

-శ్రీజ