తెదేపా ప్రజాగర్జన, బాలకృష్ణకు ప్రాధాన్యత

Posted: 03/12/2014 07:24 AM IST

నందమూరి బాలకృష్ణ ఒకవేళ ఎన్నికలలో పోటీ చేస్తానంటే మాత్రం ఆయనకు సీటు ఖరారు చేస్తామని తెలుగుదేశం పార్టీ అధ్యక్షుడు చంద్రబాబు నాయుడు మంగళవారం ఆయన నివాసంలో జరిగిన మీడియా సమావేశంలో అన్నారు.  అది కూడా ఆయన ఏది కోరుకుంటే అది- శాసనసభకు కాని లోక్ సభకు కానీ ప్రాతినిధ్యం వహించవచ్చని చంద్రబాబు అన్నారు. 

ఈరోజు విశాఖపట్నంలో జరుగనున్న ప్రజాగర్జన బహిరంగ సభలో చంద్రబాబు ప్రసంగిస్తారు.  మధ్యాహ్నం 12.30 కి విశాఖపట్నం చేరనున్న చంద్రబాబు, మధ్యాహ్నం 3.30 గంటలకు పూర్ణ మార్కెట్, టౌన్ కొత్తరోడ్, సీ హార్సెస్ మీదుగా ఇందిరా ప్రియదర్శిని మినీ స్టేడియం వరకు ర్యాలీగా బయలుదేరి వెళ్తారు.  చంద్రబాబు నాయుడు ప్రసంగం సాయంత్రం 5.00 గంటలకు ప్రారంభమౌతుంది.

ఎప్పుడూ ఆధునికతవైపు మొగ్గు చూపే చంద్రబాబు నాయుడు ఈసారి పార్టీలో అభ్యర్థుల ఎంపికను అత్యాధునిక సాంకేతిక పరిజ్ఞానం ద్వారా చేస్తున్నామని తెలియజేసారు.  దేశంలోనే మొదటిసారిగా చేసే ఈ అభ్యర్ధుల ఎంపిక ప్రక్రియను ప్రజలు మెచ్చే నాయకుడిని ఆ ప్రాంతంలో నిలబెట్టే విధంగా ఉంటుందని కూడా ఆయన అన్నారు. 

ప్రజాగర్జన సభలో చంద్రబాబు సమక్షంలో లాంఛనప్రాయంగా మాజీ మంత్రి గంటా శ్రీనివాసరావు, ఎమ్మెల్యేలు పంచకర్ల రమేష్, అవంతి శ్రీనివాస్, వెంకట్రామయ్య, రమణమూర్తి రాజు తెలుగు దేశం పార్టీ లో చేరుతారు. 

-శ్రీజ