కార్యకర్త నుండి సిఎం వరకు కాంగ్రెస్ లోనే- సత్తిబాబు

Posted: 02/18/2014 08:51 AM IST

ముఖ్యమంత్రి కిరణ్ కుమార్ రెడ్డి రాజీనామా చేస్తారని, కొత్త పార్టీ పెడతారని వస్తున్న వార్తల నేపథ్యంలో పిసిసి అధ్యక్షుడు బొత్సా సత్యనారాయణ తన మనసులోని మాటను బయటపెట్టారు.  తాను మాత్రం కాంగ్రెస్ ని వీడి పోనని, కార్తకర్త నుంచి సిఎం వరకు తాను సేవచెయ్యదలచుకుంది కాంగ్రెస్ లోనేనని ఆయన అన్నారు.

బొత్సా సత్యనారాయణతో భేటీ అయిన మంత్రులు విభజన బిల్లుని ఆపటం కోసం ఆఖరు ప్రయత్నం చెయ్యాలని నిర్ణయించుకున్నారు.  బొత్సా నివాసంలో సోమవారం సాయంత్రం జరిగిన ఈ సమావేశంలో మంత్రులు ఆనం రామ నారాయణ, రఘువీరా రెడ్డి, కన్నా, కొండ్రు మురళి, బాలరాజు, మాణిక్య వరప్రసాద్, సి.రామచంద్రయ్య తదితరులు హాజరవగా సోమవారం ఉదయం బొత్సాతో వట్టి వసంత కుమార్, శైలజా నాథ్, పార్థసారధి, కాసు కృష్ణారెడ్డి భేటీ అయ్యారు.

ఈ సమావేశాలకు అజెండా కిరణ్ కుమార్ రెడ్డి కొత్త పార్టీ పెడితే అందులో ఎవరు చేరతారని తెలుసుకోవటం.  కిరణ్ కుమార్ రాజీనామా చెయ్యరని కొందరు చేస్తారని కొందరు, చేస్తే మాత్రం ప్రయోజనం ఏమిటని మరికొందరు అభిప్రాయపడ్డారు.  రాజీనామా చెయ్యవలసిన సమయం ఇది కాదని, బిల్లు తయారవుతున్నప్పుడే మూకుమ్మడి రాజీనామాలు చేసుంటే పరిస్థితి మరోలా ఉండేదని బొత్సా అన్నారు.

భేటీ అయిన మంత్రులలో కొందరు ఉంటే కాంగ్రెస్ లో ఉంటాం లేకపోతే స్వతంత్ర్య అభ్యర్థిగా పోటీ చేస్తామని తెలియజేసారు. కొందరు ఆలోచించి చెప్తామని, సమయం కావాలని, నియోజక వర్గంలో ప్రజల అభిప్రాయం తెలుసుకుని చెప్తామని అన్నారు.

బొత్సా మాత్రం తను సిఎం అవదలచుకున్నానన్న మాటను మాత్రం మర్మగర్భంగా కాంగ్రెస్ కి విశ్వాస పాత్రుడననే మాటల్లో చెప్పారు.

-శ్రీజ