గాంధీ జీవిత శైలే ఆయన మనకిచ్చే సందేశం

Posted: 01/30/2014 04:16 PM IST

మహాత్మా గాంధీగా, రాష్ట్రపితగా దేశవాసుల హృదయాలలో పదిలంగా చోటుచేసుకున్న మోహన్ దాస్ కరమ్ చంద్ గాంధీ వర్ధంతి ఈ రోజు.  పై ఫొటోలో మహాత్మా గాంధీ సమాధి- ఢిల్లీలోని రాజ్ ఘాట్.

అహింసావాదం, నిరాడంబర జీవితం, నిర్భయత్వం, మానవులందరి పట్ల సుహృద్భావం- ఇవీ గాంధీ పాటించిన ఆచరణలు.  అహింసాదండంతోనే ఆంగ్లేయుల పాలన నుండి భారత దేశానికి విముక్తి కలిగించిన గాంధీ ఈ రోజున ఒక భారతీయుని చేతిలోనే మరణించారు.   ఎప్పుడూ ఎవరి గురించీ పరుష ప్రయోగం చెయ్యని గాంధీ చివరగా ఉచ్ఛరించిన పదం- హైరామ్.  తన మరణానికి కారకుడైన గాడ్సేని క్షమించి వదిలిపెట్టమని గాంధీ కోరారు. 

గాంధీ రాజకీయవేత్త కాదు, విప్లవకారుడు కాదు, కరడుగట్టిన ప్రాంతీయవాది కాదు.  కేవలం ఆధ్యాత్మిక పరిణితి పొందిన అహింసా యోధుడు.  అందువలన ఆయన ఉపన్యాసాల ద్వారా నీతిని ప్రబోధించే కార్యక్రమాలు చేపట్టలేదు.  మానవతావాదాన్ని తానుగా ఆచరిస్తూ మనకు పరోక్షంగా బోధించాడు.   అందుకే ఆయనకు మనదేశమే కాదు ప్రపంచమంతా నీరాజనమిచ్చింది.  భారత దేశాన్ని పరిపాలిస్తున్న బ్రిటిష్ వారు కూడా ఆయనకు గౌరవమిచ్చి సముచిత స్థానాన్నిచ్చారు.

దేశమంతా ఈ రోజు గాంధీ మహాత్ముని వర్ధంతి సందర్భంగా ఆయనకు నివాళులర్పిస్తూ ఆయన గుణగణాలను గుర్తుకి తెచ్చుకున్నారు.  ఢిల్లీలోని మహాత్మా గాంధీ సమాధి రాజ్ ఘాట్ లో నాయకులంతా ఈ రోజు అంజలి ఘటించి ఆయనకు నివాళులర్పించారు. 

గాంధీ జీవనశైలి ఆయన మనకిచ్చిన సందేశమైతే దాన్ని అనుసరించటానికి త్రికరణశుద్ధిగా చేసే ప్రయత్నమే మనమివ్వగలిగిన నిజమైన నివాళి

మహాత్ముని జీవిత విశేషాలను స్మరించుకుంటూ ఈ క్రింది స్లైడ్ షోని చూడండి.

-శ్రీజ