రాజకీయాల్లోకి అశోక్ బాబు ?

Posted: 11/02/2013 08:31 AM IST

సమైక్యాంధ్ర కోసం ఏపీ ఎన్జీఓలందర్ని ఒకే తాటి పైకి తెచ్చి, ఉద్యమాన్ని నడిపిస్తున్న ఆంధ్రప్రదేశ్ పరిరక్షణ వేదిక అధ్యక్షుడు  అశోక్‌బాబు త్వరలో రాజకీయాల్లోకి రాబోతున్నాడా ? అంటే ఆయన మాటల్ని బట్టి అవుననే అనిపిస్తుంది. ఇన్ని రోజులు ఉద్యమంలోకి రాజకీయ పార్టీల్ని రానివ్వం.... రాజకీయ నాయకులతో, పార్టీలతో సబంధం లేకుండా ఉద్యమాన్ని నడిపిస్తామంటున్న అశోక్ బాబు మనస్సు రాజకీయాల వైపు మళ్లినట్లుంది. అందుకే ఆయన సూత్రపాయంగా రాజకీయాల్లోకి రావాల్సివస్తుందేమోనని అన్నారు.

నిన్న రాత్రి కృష్ణాజిల్లా గుడివాడలో జరిగిన ‘సేవ్ ఆంధ్రప్రదేశ్’ సభలో ఆయన మాట్లాడుతూ ప్రస్తుత రాజకీయ పార్టీలు, అవకాశవాద నాయకులను చూస్తుంటే రాజకీయాల్లోకి రావాలన్న ప్రజల సూచనను మన్నించాల్సి వస్తుందేమోనని పేర్కొన్నారు. తాము ఉద్యోగాల్లో ఉంటూ ఉద్యమాలు చేస్తున్నది జీతాల కోసం కాదని, భవిషత్తులో మా బిడ్డల జీవితాల కోసం చేస్తున్నామని, రాజకీయ నాయకుల చేతకాని తనం వల్లే రాష్ట్ర విభజన జరిగిందని అన్న ఆయన ప్రజల కోసం, మా బిడ్డల జీవితాల కోసం ఉద్యోగులు ఉద్యమం బాట పట్టాల్సి వచ్చిందని, ఉద్యోగులంతా ఏకమై 2014 వరకు తెలంగాణ రాష్ట్ర విభజనను అడ్డుకోగలమని అన్నారు.

ఈసారి జరిగే పీపుల్స్ రివల్యూషన్ (ప్రజల తిరుగుబాటు) ఢిల్లీ పీఠాన్ని కదిలిస్తుందని, రాజకీయ పార్టీల చరిత్రనే మార్చేస్తుందని అన్నారు. ఆంధ్ర ప్రదేశ్ కి పెద్ద దిక్కుగా ఉన్న హైదరాబాద్ ను తెలంగాణలో కలిపేస్తే... ఢిల్లీని యూపీలో కలుపుతారా అని ప్రశ్నించారు.

ఉద్యోగుల అండతో, ప్రజల సహాకారంతో ఉద్యమాన్ని నడుపుతున్న అశోక్ బాబు రాజకీయాల్లోకి వస్తే.... ఇప్పుడు చేతకాని రాజకీయ నాయకులు అని మాట్లాడుతున్న ఆయన అప్పుడు ఈయన కూడా ఓ చేతకాని నాయకుడిగా మిగిలిపోతాడనటంలో సందేహం లేదు. గతంలో టీఎన్ న్జీఓ అధ్యక్షుడు స్వామి గౌడ్ పరిస్థితి ఏమయ్యిందో గుర్తుకుతెచ్చుకుంటే మంచిది. ఒకవేళ రాజకీయాల్లోకి వస్తే సొంత పార్టీ పెడతారా ? ఇప్పుడు ఈయన వెనక ఉండి ఉద్యమాన్ని నడిపిస్తున్న కిరణ్ పెట్టబోయే పార్టీలో చేరుతారో చూడాలి.