చైనాను కుదిపేసిన భూకంపం

Posted: 07/22/2013 03:17 PM IST

ప్రక్రుతి మనుషుల పై పగబట్టినట్లు ఉంది. దాని కోపానికి చైనా అతలాకుతలం అయింది. ఇప్పటికే చైనాలో వరదల కారణంగా చాలా అవస్థలు పుడుతూ అల్లడుతున్న జనానికి పుండుమీద కారం చల్లినట్లు... నేడు భారత కాలమానం ప్రకారం తెల్లవారుజామున ఐదు గంటల ప్రాంతంలో జింజియాన్, మిన్సియన్ రాష్ట్రాలను భూకంపం కుదిపేసింది. ఈ భూకంప తీవ్రత రిక్టర్ స్కేలు పై  6.6 గా నమోదు అయింది. ఈ భూకంపానికి మనకందిన సమాచారం ప్రకారం 47 మంది చనిపోయినట్లు సమాచారం. ఈ ఘటనలో మూడు వందల మందికి పైగా గాయపడ్డారు. భూకంప కేంద్రం బైడావో నగరానికి 151 కిలోమీటర్ల దూరంలో భూమికి కేవలం 9.8 కిలోమీటర్ల లోతున ఉంది. రెండు గంటల తర్వాత.. అంటే ఉదయం ఏడు గంటల ప్రాంతంలో 5.6 తీవ్రతతో మరో భూకంపం కూడా వచ్చింది. 5,600 ఇళ్లలోని దాదాపు 21 వేల గదులు ధ్వంసమయ్యాయి. జాంజియాన్ రాష్ట్రంలో 1,203 గదులు కూలిపోయినట్లు సమాచారం. కేబుళ్లు తెగిపోవడంతో టెలికమ్యూనికేషన్ లేకుండా పోయింది. ఈ భూకంప ప్రభావం చాలా టౌన్షిప్లపై ఉండటంతో ఇళ్ళు చాలా వరకు పూర్తిగా ధ్వంసం అయ్యాయి. ఇళ్లతో పాటు భారీ వృక్షాలు కూడా ఊగుతూ కనిపించాయి. భూకంప ప్రభావిత ప్రాంతాల్లో సహాయక చర్యలు చేపట్టడానికి పోలీసులు, సైనికులతో పాటు స్థానిక మిలీషియా సిబ్బందిని కూడా పంపారు. చైనా రెడ్క్రాస్ సొసైటీ కూడా సహాయ సామగ్రితో సిబ్బందిని పంపింది. రైల్వే వంతెనలు, టెలికం టవర్లను త్వరగా పునరుద్ధరించడానికి యుద్ధప్రాతిపదికన పనులు మొదలయ్యాయి . మరికొన్ని గంటలు ఆగితే గానీ పూర్తి సమాచారం తెలిసే పరిస్థితి కనిపిస్తుంది.  మృతుల సంఖ్య పెరిగే అవకాశం ఉందని అంటున్నారు అధికారులు. గాయపడిన వారికి మెరుగైన చికిత్స అందించాల్సిగా యంత్రాంగం ఆదేశాలు జారీ చేసింది. ఈ భూకంపంతో ఆ రెండు రాష్ట్రాల ప్రజల పరిస్థితి అగమ్యగోచరంగా మారింది.