Posted: 03/20/2013 01:08 PM IST

సయోధ్యకు ఏమాత్రం అవకాశం లేదనే రీతిలో ఈ రోజు డిఎమ్ కే కేంద్ర మంత్రులు ప్రధాన మంత్రిని కలిసి రాజీనామాలు సమర్పించారు.  నిన్న రాత్రి రాష్ట్రపతికి యుపిఏ మద్దతును ఉపసంహరించుకుంటున్నామని లేఖనిచ్చిన తర్వాత తాజాగా రాజీనామాలను కూడా సమర్పించి శ్రీలంక తమిళయన్ల పట్ల జరిగి ఘోరాల పట్ల తమ ఆవేదనను వెలిబుచ్చారు.  

అయితే, ఆర్థిక మంత్రి చిదంబరం డిఎమ్ కే ప్రవర్తన పట్ల ఆశ్చర్యాన్ని వెలిబుచ్చుతూ, ఆ పార్టీ డిమాండ్లను మేము పూర్తి చేస్తుంటేనే వాళ్ళు తెగతెంపులు చేసుకోవటం విచిత్రంగా ఉందన్నారు.  అయినా కేంద్ర ప్రభుత్వానికి ఏ నష్టమూ జరగదని, ఒక మిత్రపక్షం మైత్రిని వదిలినంత మాత్రంచేత ఊగిసలాడే స్థితిలో కేంద్ర ప్రభుత్వం లేదని ఆయన అన్నారు.  18 రాత్రి నుంచి 19 ఉదయం మధ్యలో ఆ పార్టీ నిర్ణయాలు మారిపోయాయని, అందుకు కారణాలేమిటో తెలియటం లేదని, ఒకపక్క వాళ్ళు చెప్పినట్టుగానే తీవ్ర స్థాయిలో అమెరికా మానవహక్కుల సంఘానికి ప్రతిపాదన పంపిస్తుంటే ఉన్నట్టుండి మద్దతుని ఉపసంహరించుకుంటామనటం విపరీత ధోరణని చిదంబరం అన్నారు.

చివరగా చిదంబరం మీడియాను విమర్శిస్తూ, మా ప్రభుత్వం స్థిరంగా ఉంది.  అందులో ఎవరికీ ఎటువంటి అనుమానమూ లేదు.  ఒక పార్టీ వీడిపోయినంత మాత్రంచేత యుపిఏ ప్రభుత్వం నీరసించి పోదు.  కేవలం మీడియా మాత్రమే అనవసరంగా ఆందోళన పడుతోంది అన్నారాయన.

-శ్రీజ