Posted: 11/25/2012 02:27 PM IST

     

      దేశంలోని 15 రాష్ట్రాల్లో గల 51 జిల్లాల్లో ‘ఆధార్’ వ్యవస్థ ద్వారా ప్రజలకు నేరుగా నగదు సబ్సిడీ చెల్లించే ప్రక్రియను జనవరి 1 నుంచి ప్రభుత్వం ప్రారంభిస్తుందని కేంద్ర ఆర్థిక శాఖ మంత్రి పి.చిదంబరం తెలిపారు. 2013 చివరి నాటికి దేశమంతటా ఈ ప్రక్రియను అమలులోకి తీసుకురావాలని ప్రభుత్వం భావిస్తోందని ఆయన చెప్పారు. ఈ ప్రక్రియ వలన సంబంధిత లబ్ధిదారులకు నేరుగా నగదు సబ్సిడీలు చెల్లించేందుకు వీలుకలుగుతుందని ఆయన అన్నారు.
       పుణేలో జరిగిన బాంకొన్ సదస్సులో చిదంబరం ఈ విషయాన్ని వెల్లడించారు. పెన్షన్లు, వివిధ సబ్సిడీల కోసం ప్రభుత్వం వేలాది కోట్ల రూపాయలను వెచ్చిస్తోందని ఆయన చెప్పారు. ఈ నగదు బదిలీ పథకాన్ని అమలుచేసే విషయమై ప్రధాన మంత్రి మన్మోహన్ సింగ్ రేపు (సోమవారం) సంబంధిత కమిటీతో సమావేశం జరుపుతారని చిదంబరం తెలిపారు.
         ప్రస్తుతం ఆర్థిక వ్యవస్థ మందగమనంలో ఉందని, ఈ ఏడాది రెండో క్వార్టర్‌లో ఆర్థికాభివృద్ధి రేటు 5.5 శాతంగా ఉంటుందని భావిస్తున్నామని ఆయన చెప్పారు. 8 శాతం ఆర్థికాభివృద్ధి సాధించాలన్నది మన ఆకాంక్ష కాకూడదని, 8 శాతం కంటే ఎక్కువ వృద్ధిరేటు సాధించాలని మనం కాంక్షించాలని చిదంబరం అన్నారు.

..avnk