Posted: 11/22/2012 01:19 PM IST

అమెరికా అధ్యక్షుడు బరాక్ ఒబామా అధికార యంత్రాంగంలో భారత-అమెరికన్ మహిళకు కీలకస్థానం దక్కింది. అక్కడి నేషనల్ మ్యూజియం-లైబ్రరీ సర్వీసెస్ బోర్డు మెంబర్‌గా విశాఖా దేశాయ్ నియమితులయ్యారు. ఈ మేరకు అధ్యక్ష కార్యాలయం ఒక ప్రకటన విడుదల చేసింది. దేశాయ్ ప్రస్తుతం అంతర్జాతీయ సంస్థ ఆసియా సొసైటీకి అధ్యక్షురాలిగా వ్యవహరిస్తున్నారు. భారత్‌కు చెందిన దేశాయ్ బాంబే యూనివర్సిటీలో గ్రాడ్యుయేట్ పట్టాను, మిచిగాన్ వర్సిటీలో ఎంఏ, పీహెచ్‌డీని పూర్తిచేశారు.1977-1990 వరకు బోస్టన్‌లోని ఫైన్ ఆర్ట్స్ మ్యూజియంలో పనిచేశారు. అక్కడ భారత్, ఆగ్నేయాసియా, ఇస్లామిక్ కళాకృతులకు పరిరక్షణలో కీలకపాత్ర పోషిస్తూ.. 1981-90 వరకు అసిస్టెంట్ క్యూరేటర్‌గా వ్యవహరించారు. 1981-88 వరకు అకడమిక్ ప్రోగ్రామ్స్‌కు హెడ్‌గా, పలు వర్సిటీలకు విజిటింగ్ ఫ్యాకల్టీగా పనిచేశారు. 1988-90 వరకు మాస్సాచుసెట్స్ విశ్వవిద్యాలయంలో అధ్యాపకురాలిగా విధులు నిర్వహించారు. 1998-99 వరకు అసోసియేషన్ ఆఫ్ ఆర్ట్ మ్యూజియం డెరైక్టర్స్‌కు అధ్యక్షురాలిగా వ్యవహరించారు. న్యూయార్క్ పట్టణ సాంస్కృతిక వ్యవహారాల కమిషన్‌కు సలహాదారుగా కూడా సేవలందిస్తున్నారు.