Posted: 11/07/2012 03:03 PM IST

ఆయనకు ఆక్రోశం వస్తే ఎలా ఉంటుందో  నిరూపించారు.   ఆ జిల్లా కలెక్టర్ చేత స్వామీజి పరుగులు తీయించారు.  స్వామీజీ తలచుకుంటే ఏం జరుగుతుందో  రాష్ట్ర ప్రజలకు తెలిసింది. తూర్పుగోదావరి జిల్లా తాండవనదీ తీరంలోని కుమ్మరిలోవ తపోవనం ఆశ్రమ పీఠాధిపతి సచ్చిదానంద సరస్వతి స్వామీజీ శాంతియుత పోరాటం చేశారు. వరద సమయంలో తనపట్ల ఆధికారులు చూపిన నిర్లక్ష్యంపై రాష్ట్ర గవర్నర్, ఇతర ఉన్నతాధికారులకు ఫిర్యాదు చేసి జిల్లా యంత్రాంగాన్ని గడగడలాడించారు. రెండురోజుల క్రితం తాండవనది ఉగ్రరూపంలో విరుచుకుపడడంతో 'సచ్చిదానంద' తన శిష్యబృందంతో సహా ఆశ్రమం పై కప్పు ఎక్కి ప్రాణాలు దక్కించుకున్నారు. చుట్టూ నిలువెత్తు నీరు కమ్ముకొచ్చి ఆశ్రమం మొత్తాన్ని కబళించింది. ఆ సమయంలో ఆయన స్థానిక యంత్రాంగానికి సమాచారమిచ్చి సాయం చేయాలని కోరినా స్పందించకపోయేసరికి కేంద్రం విపత్తు నివారణా సంస్థకు చెప్పడంతో ఆయన రక్షణకు నేవీ హెలికాప్టర్ పంపారు.

అప్పటికే నీటి మట్టం తగ్గడంతో ఆలస్యంగా స్పందించిన యంత్రాంగం సేవలు తనకు అక్కరలేదని తిప్పి పంపారు. తదుపరి రెండు రోజులైనా అధికారులు ఆశ్రమం వైపు కన్నెత్తి చూసిన పాపానపోలేదు. దీంతో స్వామీజీ ఆగ్రహించి రాష్ట్ర, కేంద్రాల్లో తనకున్న పలుకుబడితో గవర్నర్ ఇతర ఉన్నతాధికారులకు ఫిర్యాదు చేశారు. దీంతో ఒక్కసారిగా అధికారుల్లో కదలిక వచ్చింది. సిబ్బంది హుటాహుటిన ఆశ్రమానికి వెళ్ళి పాలు ఇతర ఆహారపదార్థాలు అందజేసినా ఆయన స్వీకరించలేదు. ఏకంగా జిల్లా కలెక్టర్ నీతుకుమారి ఆశ్రమానికి చేరుకుని అవకాశం లేక రాలేకపోయామని, నిర్లక్ష్యం చేయలేదని సర్దిచెప్పారు. దీనికి స్వామీజీ ఒక్కసారిగా తన ఆవేదనను వ్యక్తం చేశారు. ఏ ఒక్కరినుంచీ రూపాయి ఆశించకుండా ధర్మాన్ని భోధిస్తూ ఆశ్రమాన్ని అభివృద్ధ్ది చేశానన్నారు. ఇప్పుడిదంతా నీటిపాలైందన్నారు. తాండవ అధికారులు ముందస్తు సమాచారం ఇవ్వకుండా అన్నిగేట్లు ఎత్తేశారన్నారు. ఆమె అధికార యంత్రాంగం వైఫ్యలంపై తాను పరిశీలిస్తానంటూ శాంతింపజేశారు.