Posted: 08/31/2012 01:29 PM IST

సాధారణంగా ప్రియులు ప్రేయసిని ఎప్పుడు ఏదో ఒక ఆశ్చర్యంలో ముంచెత్తడానికి ప్రయత్నిస్తుంటారు. ప్రేయసి ఆనందం కోసం తాను ఏమైనా ఫర్వాలేదనుకుంటారు. అయితే ఇక్కడ ఓ చైనా యువకుడు తన ప్రేయసిని సంభ్రమాశ్చర్యాల్లో ముంచెత్తేందుకు కొత్త ప్రయత్నించాడు. కానీ చివరికి అది బెడిసికొట్టి తన ప్రాణాల మీదికి వచ్చింది. నైరుతి చైనాలోని చాంగ్కింగ్ నగరానికి చెందిన హు సెంగ్ అనే యువకుడు లీ వాంగ్ అనే యువతితో పీకల్లోతు ప్రేమాయణంలో మునిగిపోయాడు.

ప్రియురాలిని ఎలాగైనా అవాక్కయ్యేలా చేయాలనే ఉద్దేశంతో, ఆమె ఆఫీసు చిరునామాకు తనను తానే కొరియర్ చేసుకున్నాడు. కొరియర్ పార్సిల్ 30 నిమిషాల్లో డెలివరీ కావాల్సి ఉండగా, అనుకోకుండా ఆలస్యమై మూడు గంటల తర్వాత గానీ చిరునామాకు చేరలేదు. దీంతో అంతసేపూ పార్సిల్ పెట్టెలో చిక్కి అతగాడు ఉక్కిరిబిక్కిరయ్యాడు. పార్శిల్ తెరిచేటప్పటికి అపస్మారక స్థితిలో ఉన్న అతడిని హుటాహుటిన ఆస్పత్రికి తరలించడంతో చివరకు చావుతప్పి కన్ను లొట్టపోయినట్లుగా బతికి బయట పడ్డాడు. ఏదో చేద్దామని పోతే ఏదో అయినట్లుంది ఇతగాడి వ్యవహారం.