Posted: 08/20/2012 03:37 PM IST

తనను వెంటాడటం, వేధించడం ఆపాలని జూలియన్ అసాంజే  లండన్ నడిబొడ్డుపై నున్న ఈక్వెడార్ ఎంబసీ నుండి మాట్లాడుతూ అమెరికా, బ్రిటన్‌లను హెచ్చరించారు. తనను, వికీలీక్స్‌నూ అణచివేయడంలో ఐక్యత కనిపించిందని, అయితే, అంతే సంఘటితంగా ప్రతిఘటన కూడా ఉండి తీరుతుందని వికీలీక్స్ వ్యవస్థాపకుడు అసాంజే గర్జించారు. తనపై, వికీలీక్స్ సంస్థపై కుట్రపూరిత వేటను ఆపాలని అమెరికాను ఘాటుగా హెచ్చరించారు.మంచి ఆలోచనలు చేయాలని అధ్యక్షుడు బరాక్ ఒబామాకు బహిరంగంగా సూచించారు.

బ్రిటన్ అరెస్టు హెచ్చరికలు, దౌత్యపరమైన హూంకరింపుల మధ్య అజ్ఞాతంలోకి వెళ్లిపోయిన అసాంజే రెండు నెలల తరువాత తొలిసారి లండన్‌లోని ఈక్విడార్ దౌత్య కార్యాలయంలో ప్రత్యక్షమయ్యారు. బ్రిటన్ వైమానిక దళ హెలికాప్టర్ల చక్కర్లు, వంద మంది పోలీసు అధికారుల మోహరింపు మధ్య దౌత్య మీడియాతో మాట్లాడారు.కార్యాలయం లండన్‌లో ఉన్నా.. సాంకేతికంగా అది ఈక్విడార్ పరిధిలో ఉన్నట్టు లెక్క.. దీంతో లండన్ నడిబొడ్డున అసాంజే మీడియా సమావేశం పెట్టినా బ్రిటన్ ప్రభుత్వం ఏమీ చేయలేకపోయింది. పైకి బ్రిటన్ వేధింపుల్లా కనిపించినా, తెర వెనుక ఉండి ఆడిస్తున్నది అమెరికాయేనని అసాంజే స్పష్టం చేశారు.