Posted: 05/15/2012 10:30 AM IST

అతను హోటల్‌లో ఒక వెయిటర్. డ్యూటీలో ఉండగా గుండెపోటు వచ్చి మరణించాడు. ఈ విషయం 28 ఏళ్ల ఆ వెయిటర్ హమీద్ హఫెక్స్ అల్ నబ్దీ బంధువులకు తెలిసింది. ఇంకేముంది? ఆ యువకున్ని శ్మశానానికి తరలించి ఇస్లాం మత సంప్రదాయ ప్రకారం పూడ్చి పెట్టేందుకు మృతదేహాన్ని పూర్తిగా తడిపారు. ఈలోగా యువకుడు మరణించినట్లు ధ్రువపత్రంపై వైద్యుని సంతకం చేయాల్సి ఉంది కనుక మహిళావైద్యురాలిని అక్కడకు తీసుకువచ్చారు. ఆ మహిళావైద్యురాలు నబ్దీ శరీరం ఇంకా వేడిగానే ఉన్నట్లు గమనించి చికిత్స ప్రారంభించింది. దాంతో ఆ యువకుడు స్పృహలోకి వచ్చాడు. ఇక బంధువులు, స్నేహితుల ఆనందానికి అవధులు లేవు. అక్కడ అంత్య క్రియల కార్యక్రమం కాస్తా‘పునర్జీవన’ సంబరంగా మారింది. కన్నీళ్లు పెడుతున్న బంధువులు, స్నేహితులు అందరూ నబ్దీ బతికినందుకు సంబరాలు చేశారు. ఈ సంఘటన ఈజిప్టులోని లక్సర్ ప్రాంతంలో జరిగింది. వెయిటర్ నబ్దీ నాగల్ సిమ్మాన్ గ్రామానికి చెందిన యువకుడు.