Posted: 04/16/2012 07:10 PM IST

మీరు పనిలో బిజీగా ఉన్నప్పుడు ఓ ఎస్ఎంఎస్/ఈమెయిల్ వచ్చింది! 'అమ్మా నా చెడ్డీ మార్చు' అన్న సందేశం చూసేసరికి మీ పసిపాప విషయం గుర్తుకొచ్చేసింది!! ఇలాంటి ఊహను శాస్త్రవేత్తలు నిజం చేశారు. చిన్నారి విషయంలో తల్లిదండ్రుల ఆందోళన తగ్గించడానికి పరిశోధకులు ఓ సరికొత్త పరికరాన్ని సృష్టించారు. ఇది పాప చర్మంపై తడిని గుర్తించి చెడ్డీ మార్చాల్సిన విషయాన్ని ఎస్ఎంఎస్ లేదా ఈమెయిల్ ద్వారా తల్లిదండ్రులకు చెబుతుంది. అలాగే చిన్నారి సంతోషంగా ఉందా? లేదా అన్నది కూడా ఈ పరికరం గుర్తిస్తుందట! ఇందుకోసం పాప గుండె కొట్టుకునే వేగం, శ్వాస తీరు, శరీర ఉష్ణోగ్రతను ఈ పరికరం ఎప్పటికప్పుడు విశ్లేషిస్తుందని పరిశోధకులు తెలిపారు. ఇది అమెరికాలో ఇప్పటికే అందుబాటులోకి వచ్చింది. అయితే బిడ్డకు సంబంధించిన మరింత సమాచారాన్ని కూడా ఈ పరికరం ద్వారా తెలియజేసేందుకు ప్రయత్నిస్తున్నట్లు పరిశోధకులు తెలిపారు.