Posted: 01/29/2012 05:23 PM IST

యానాంలో పోలీస్ చర్యలో యూనియన్ లీడర్ ప్రాణాలు పోగొట్టుకున్న విషయంలో హైకోర్టు జడ్జ్ తో విచారణ జరిపించవలసిందిగా కోరుతూ అన్ని ట్రేడ్ యూనియన్లూ ఫిబ్రవరి 2న బంద్ కి పిలుపునిచ్చాయి. దానితో పాటుగా అసువులు బాసిన నాయకుడి కుటుంబానికి పరిహారంగా 25 లక్షలు ఇవ్వాలని కూడా పట్టుబడుతున్నాయి. ఏఐటియుసి, సిఐటియు, ఐఎన్ టియుసి, ఇంకా ఇతర పార్టీలకు చెందిన యూనియన్లన్నీ కలిసి ఈ నిర్ణయం తీసుకున్నాయని ఏఐటియుసి పుదుచ్చేరి రాష్ట్ర కౌన్సిల్ డెప్యూటీ జనరల్ సెక్రటరీ దినేష్ పొన్నయ్య తెలియజేసారు. జనవరి 27న యానాం లో జరిగిన ఆందోళన, హింసాత్మక చర్యల్లో ప్రాణనష్టం, ఆస్తి నష్టం జరిగింది. కార్మిక నాయకుడు ఎమ్ఎస్ మురళీ మోహన్ పోలీస్ చర్యలో మృతిచెందటంతో ఉద్రేకానికి లోనైన రీజెన్సీ సిరామిక్స్ కార్మికులు యానాంలో హింసకు పాల్పడ్డారు. దానితో పోలీసులు కాల్పులు జరిపారు.

రీజెన్సీ సిరామిక్స్ సంస్థ ప్రెసిడెంట్ (ఆపరేషన్స్) కెసి చంద్రశేఖర్ ఇంటి మీద దాడి చేసిన కార్మికులు ఆయన్ని తల మీద కొట్టగా చంద్రశేఖర్ మృతిచెందారు. రీజెన్సీ విద్యాసంస్థలలోని ఆస్తికి నష్టం కలిగిస్తూ అందులో ఎలక్ట్రానిక్ ఇతర సామగ్రిని ధ్వంసం చేస్తుండగా వారిని చెదరగొట్టటానికి పోలీసులు చేసిన కాల్పుల్లో 9 మందికి బుల్లెట్లు తగిలాయి. పోలీసు బుల్లెట్ల బారిన పడిన కార్మికులకు ఒక్కొక్కరికి 10 లక్షలు చొప్పున పరిహారం చెల్లించమని కూడా పొన్నయ్య కోరుతున్నారు. అంతే కాకుండా హింసకు పూనుకున్న పోలీసులను పదవుల్లోంచి తొలగించాలని కూడా పొన్నయ్య డిమాండ్.

జరిగిన దొమ్మీలో విద్యాసంస్థల్లో కంప్యూటర్లు, ఎలక్ట్రానిక్ వస్తువులు, ఫర్నిచర్ లాంటి ఖరీదైన వస్తువుల లూటీ జరిగింది. అయితే యానాం శాసనసభ్యుడు మల్లాడి కృష్ణారావు పిలుపుతో స్థానికులు ఆ సామాన్లను స్పచ్ఛందంగా తిరిగి విద్యా సంస్థకి తిరిగి ఇచ్చేయటం విశేషం.

-శ్రీజ