Posted: 01/29/2012 04:55 PM IST

తెలంగాణా పోరు యాత్రలో ఈరోజు కాగజ్ నగర్ చేరుకున్న భాజపా నాయకుడు కిషన్ రెడ్డి తెలంగాణా మీద కాంగ్రెస్, తెదేపాల వైఖరిని తప్పు పట్టారు. ప్రతి పార్టీలోనూ నాయకుల మస్తిష్కంలో ముద్రపడ్డ 2014 వారి ఉపన్యాసాల్లో వారికి తెలియకుండానే వారి నాలుక మీదకు వచ్చినట్టుగానే కిషన్ రెడ్డి 2014 లోపులోనే తెలంగాణా బిల్లు పార్లమెంటులో ప్రవేశపెట్టేట్టుగా చూస్తామని, కుదరని పక్షంలో 2014లో అధికారంలోకి రాగానే మొదటి సంతకం ప్రత్యేక తెలంగాణా బిల్లు మీదనే ఉంటందని అన్నారు.

దేవుడు ప్రత్యక్షమై ఏం కావాలని అడిగితే తనకోసమేమీ కోరుకోలేదట ఒకామె. మా అత్తగారు బంగారు ఉయ్యాల్లో తన మనవడిని ఊపుతూ ఆడుకునేట్టుగా వరమివ్వమందట. కోరుకున్నది అత్తగారికోసమే కానీ అందులో ఎన్ని విషయాలు దాగున్నాయో చూడండి. బంగారు ఊయల ఊపేది అత్తగారైనా అది తన ఆస్తి కిందికే వస్తుంది. ఉయ్యాలే బంగారుదైనప్పుడు ఆ లెక్కన మిగతా ఆస్తులెలా ఉంటాయో ఊహించుకోండి. ఆవిడ ఉయ్యాల ఊపుతూ మనవడితో ఆడుకుంటుందంటే ఆమె ఆరోగ్యం, ఆ చిన్నపిల్లవాడి ఆరోగ్యం కూడా బావుండాలి. అసలీమెకి బిడ్డలే కలుగలేదు. అంటే సంతానప్రాప్తి కూడా అవాలి.

2014లో మేము అధికారంలోకి వచ్చిన తర్వాత.... అని తెదేపా అంటూనే వుంది, భాజపా అంటోంది, కాంగ్రెస్ కూడా ధీమా వ్యక్తపరుస్తోంది. అంటే మీరంతా మాకు ఓటేస్తారు మేము గెలుస్తాం అని చెప్పటం. అలా వెయ్యటం కోసమే మిగతా పార్టీలవన్నీ మోసపూరితమైన ప్రకటనలు, ఆచరణలు అని చెప్పటం, వీలయితై కుమ్ముక్కులైన పార్టీలని వారిని తూలనాడటం.

-శ్రీజ