Posted: 01/21/2012 07:29 PM IST

          మరో పది రోజుల్లో అంటే ఫిబ్రవరి నెల తొలి వారం నుంచి తెలంగాణ సెగ మళ్లీ రాజుకోనుంది. ఫిబ్రవరి నుంచి తెలంగాణ సాధన యాత్రలు మరింత ఉధృతం చేస్తామని తెలంగాణ రాజకీయ జేఏసీ స్పష్టం చేసింది. తెలంగాణ ప్రజలకు ఇచ్చిన హామీలను కేంద్ర, రాష్ట్ర ప్రభుత్వాలు విస్మరించాయని జేఏసీ ఛైర్మన్ కోదండరాం విమర్శించారు. సకల జనుల సమ్మె సమయంలో ఉద్యోగులకు ఇచ్చిన హామీలను నెరవేర్చాలని ఆయన సర్కారును డిమాండ్ చేశారు.

          సుధీర్ఘకాలం తర్వాత తెలంగాణ రాజకీయ జేఏసీ ఇవాళ హైదరాబాద్ లో భేటీ అయింది. ఇందులో టీఆర్ఎస్ అధినేత కేసీఆర్, జేఏసీ ఛైర్మెన్ కోదండరాం, ఉద్యోగ సంఘాల నేతలు పాల్గొన్నారు. ఈ భేటీలో భవిష్యత్ ఉద్యమ కార్యాచరణను నిర్ణయించారు. ఇందులో భాగంగా చేపట్టాల్సిన నిరసన కార్యక్రమాల షెడ్యూల్ ను ప్రకటించారు.

ఫిబ్రవరి మొదటివారంలో మండల స్థాయి తెలంగాణ యాత్రలు చేపడుతున్నట్లు ప్రకటించారు. ఈనెల 27 లోగా జిల్లా విస్తృత స్థాయి సమావేశాలు జరపాలని నిర్ణయించారు. 31న జిల్లా కలెక్టర్ కార్యాలయాల ముందు ధర్నాలు చేపట్టాలని తీర్మానించారు. మొత్తంగా ఏప్రిల్ నుంచి ఉద్యమాన్ని తీవ్రతరం చేయాలని తెలంగాణ రాజకీయ జేఏసీ నేతలు సంకల్పించారు.        

                                                                                      ...avnk