Posted: 12/21/2011 09:12 AM IST

ఔటర్ రింగ్ రోడ్డులో జరిగిన ప్రమాదం మాజీ మంత్రి కోమటిరెడ్డి వెంకటరెడ్డికి పుత్రశోకాన్ని మిగిల్చింది.కొల్లూరు వద్ద రింగ్ రోడ్డులో కోమటిరెడ్డి వెంకటరెడ్డి కుమారుడు ప్రణీక్ రెడ్డి స్కోడా కారు నడుపుతూ రోడ్డు డివైడర్ ను ఢీకొట్టడంతో ఆయనతో సహా ముగ్గురు మరణించడం విషాదకరంగా ఉంది. కొద్ది కాలం క్రితమే ప్రముఖ క్రికెటర్ అజారుద్దీన్ కుమారుడు మరణించిన ఘటన మరవక ముందే కోమటిరెడ్డి కుమారుడు అదే రోడ్డులో వాహనం నడుపుతూ మరణించారు. ప్రణీక్ తో సహా ముగ్గురు మరణించారు. వారంతా చైతన్య భారతి ఇంజనీరింగ్ కాలేజీలో చదువుకుంటున్నారు. మరొకరికి తీవ్ర గాయాలయ్యాయి. ఈ ఘటనపట్ల నల్లగొండలో విషాద ఛాయలు అలుముకున్నాయి. ముఖ్యమంత్రి కిరణ్ కుమార్ రెడ్డి, ప్రతిపక్షనేత చంద్రబాబు నాయుడు,మంత్రి జానారెడ్డి , కేంద్ర మంత్రి జైపాల్ రెడ్డి తదితరులు తీవ్ర సంతాపం వ్యక్తం చేశారు.