మేఘాద్రికి వరద ముప్పు-రైతన్నకు పెద్ద కష్టం-రైలు రద్దు

Posted: 10/25/2013 03:28 PM IST

Flood threat to meghadri gedda reservoir in visakha

రాష్ట్రంలో భారీ వర్షాలు పడుతున్న నేపథ్యంలో ఈస్ట్ కోస్ట్ రైల్వే పలు రైళ్లను రద్దు చేసింది. హౌరా - చెన్నై, దిగా-విశాఖ, పూరి- తిరుపతి, విశాఖ - భువనేశ్వర్ ఇంటర్ సిటీ ఎక్స్ ప్రెస్ రైలును రద్దు చేస్తున్నట్లు రైల్వే అధికారులు ఈరోజు ప్రకటించారు. రాష్ట్రంలో కురుస్తున్న భారీ వర్షాల కారణంగా పలు రైళ్లను రద్దు చేస్తున్నట్లు అధికారులు తెలిపారు. పలు జిల్లాల్లో రైలు పట్టాలపై వరద నీరు పోటేత్తుతోంది. రైళ్లను రద్దు చేయడంతో ప్రయాణీకులు ఇబ్బందులను ఎదుర్కొంటున్నారు.

మేఘాద్రి గడ్డకు ముప్పు..

మేఘాద్రి గడ్డకు వరద ముప్పు వాటిల్లనుందని అధికారులు హెచ్చరికలు జారీ చేశారు. దీని కారణంగా నగరంలోని షీలానగర్, నవర, ఎయిర్ పోర్టు ప్రాంతాల ప్రజలకు వరద ముప్పు రానుందని అధికారులు తెలిపారు. నాలుగు రోజులుగా కురుస్తున్న భారీ వర్షాల కారణంగా రిజర్వాయర్లలోకి అత్యధికంగా నీరు వచ్చి చేరింది. జలాశయాలు నిండుకుండలా మారిపోయాయి. దీంతో అధికారులు గేట్లు ఎత్తివేశారు. లోతట్టు ప్రాంతాల ప్రజలు అప్రమత్తంగా ఉండాలని హెచ్చరికలు జారీ చేశారు.

కన్నీరు పెట్టిన రైతు

రైతన్నకు పెద్ద కష్టం వచ్చింది. భారీ వర్షాలు రైతులను అగాధంలోకి నెట్టిపడేశాయి. తమ కళ్లేదుటే పంట పోలాలు నీట మునుగుతున్నా ఏమి చేయలేకపోయారు. చేతికి అందాల్సిన పంట నీట మునిగిపోతుండడంతో రైతులు కన్నీరుమున్నీరవుతున్నారు. భారీ వర్షాలు కురుస్తుండడంతో వాగులు, వంకలు పొంగి పొర్లుతున్నాయి. చెరువులను తలపిస్తున్న పంట పొలాలను చూసి రైతులు బావురుమంటున్నారు.

రైవాడ యడమ కాలువ గట్టు తెగిపోవడంతో వందలాది ఎకరాల పంట నీటిపాలైంది. జిల్లా వ్యాప్తంగా 5వేల 247 హెక్టార్లలలో వరి పంట నీట మునిగింది. 770 హెక్టార్లలో చెరకు పంట దెబ్బతింది. 515 హెక్టార్లలోని ఉద్యానవన పంట భారీ నష్టం ఏర్పడింది. కుంటలు, చెరువులు నిండిపోయాయి. పొలాలన్నీ నీట మునిగిపోయాయి. వేరు శనగ పంట పూర్తిగి దెబ్బతింది. చేతికొచ్చిన పంట నాశనమైపోయిందని రైతులు ఆవేదన చెందుతున్నారు. ప్రభుత్వమే ఆదుకోవాలని రైతులు వేడుకుంటున్నారు.