తారల క్రికెట్

Posted: 06/03/2013 05:35 PM IST

విశాఖ నగరంలో జూన్ తొమ్మిదో తేదీ సాయంత్రం నాలుగు గంటలకు ఏసీఏ వీడీసీఏ స్టేడియంలో మ్యాచ్ ప్రారంభం కానున్నది. ఫ్లడ్ లైట్ల వెలుతురులో 20-20 మ్యాచ్ ఆడుతారు. అంతకుముందు సినీ సంగీత దర్శకుడు చక్రి ఆధ్వర్యంలో సంగీత విభావరి ఉంటుంది. ప్రముఖ గాయకుడు బాబా సెహగల్ ప్రేక్షకులను అలరించనున్నారు. నగరంలో సినీ తారలు మరోసారి సందడి చేయనున్నారు. ఈ నెల తొమ్మిదో తేదీన తెలుగు చిత్రసీమకు చెందిన సినీ తారల జట్ల మధ్య చారిటీ క్రికెట్ మ్యాచ్ నిర్వహణకు సన్నాహాలు జరుగుతున్నాయి.

గ్లాడియేటర్స్, వారియర్స్ అనే రెండు జట్ల మధ్య ప్లడ్‌లైట్ల వెలుతురులో టీ20 మ్యాచ్ జరగనున్నది. గ్లాడియేటర్ జట్టుకు శ్రీకాంత్, వారియర్స్ జట్టుకు తరుణ్ సారథ్య బాధ్యతలు చేపడుతున్నారు. శ్రీకాంత్ జట్టుకు చార్మి, తరుణ్ జట్టుకు ప్రియమణి బ్రాండ్ అంబాసిడర్లగా వ్యవహరించనున్నారు. రెండు జట్లలో తెలుగు సినీ పరిశ్రమకు చెందిన నాని, అల్లరి నరేష్, శర్వానంద్, నితిన్, నిఖిల్, తారకరత్న వంటి హీరోలతోపాటు పలువురు యువ నటులు పాల్గొంటారు.

వీరిని ఉత్సాహపరిచేందుకు, అభిమానులను అలరించేందుకు కామ్నా జెఠ్మలాని, పూనమ్ భజ్మా వంటి సుమారు 12 మంది హీరోయిన్లు వస్తున్నారు. మ్యాచ్‌ను వీక్షించేందుకు రూ.200 నుంచి 1,500 రూపాయల వరకు టికెట్ల ధరలను నిర్ణయించినట్టు తెలుస్తోంది. రూ.200, 300, 500, 1000, 1500 కేటగిరిల్లో టికెట్లు లభిస్తాయి. హోటల్ నోవాటెల్‌తోపాటు నగరంలోని పలుచోట్ల టిక్కెట్ల అమ్మకాలను చేపట్టేందుకు సన్నాహాలు చేస్తున్నారు.