Posted: 02/25/2013 09:03 PM IST

ఆధార్ కార్డు అవస్థలు ఒక్క హైదరాబాద్ నగరంలోనే అనుకున్నాం. కానీ విశాఖ వాసులకు కూడా ఆధార్ కార్డు చేయించుకోవడం నరకప్రాయంగా మారింది. అన్ని ప్రభుత్వ పథకాలకు ఆధార్ కార్డుతో లింకు పెట్టడంతో ఆధార్ కార్డు కోసం నమోదు కార్యాలయం వద్ద బారులు తీరుతున్నారు. నగరంలో ద్వారకానగర్‌లోని ఒకే కార్యాయంలో ఆధార్ నమోదు చేపడుతుండడంతో ప్రజలు వాటికోసం ఎగబడుతూ ఉదయం నుంచే పెద్ద సంఖ్యలో క్యూ కడుతున్నారు. మండుతున్న ఎండను సైతం లెక్కచేయకుండా క్యూలో నిల్చొన్నారు. వృద్ధులు, పిల్లలు, మహిళలు...ఇలా తేడా లేకుండా అందరూ వీటి కోసం ఎగబడుతున్నారు. ఇప్పటివరకు నగరంలో గరిష్ఠంగా 40 శాతం మంది మాత్రమే ఆధార్ కార్డుల కోసం నమోదు చేయించుకున్నారు. మిగతా 60 శాతం మంది నమోదు చేయించుకోవాల్సి ఉంది. అయితే చౌకధరల దుకాణాల నుంచి నిత్యావసరాలు, గ్యాస్ సబ్సిడీ, పెన్షన్, పౌరసత్వం గుర్తింపు ఇలా బహుళ ప్రయోజనాలకూ ఆధార్‌తో లింకు పెడుతూ ప్రభుత్వం ఏ క్షణంలోనైనా ఉత్తర్వులు జారీ చేయవచ్చుననే ప్రచారం జోరుగా సాగుతోంది. అందువల్ల వెంటనే ఆధార్ కార్డు పొందకుంటే తాము పొందుతున్న సబ్సిడీలన్నీ పోతాయనే భయంతో అనేక మంది ఆధార్ నమోదు కేంద్రానికి పరుగులు తీస్తున్నారు.