Posted: 02/25/2013 09:07 PM IST

దేశరక్షణ పరంగా తూర్పు తీరంలో విశాఖ నగరం అత్యంత కీలకమైనది. తూర్పు నావికాదళ ప్రధాన కార్యాలయంతోపాటు, హిందుస్థాన్ షిప్‌యార్డు, పోర్టు, స్టీల్‌ప్లాంట్ వంటి అత్యంత ప్రతిష్టాత్మకమైన పరిశ్రమలకు నెలవైన విశాఖ నగరం ప్రపంచ దేశాల దృష్టిని ఆకర్షిస్తున్నది. దేశ ఆర్థిక వ్యవస్థను ఛిన్నాభిన్నం చేయడంతోపాటు జనజీవనాన్ని అస్తవ్యస్తం చేసేందుకు కొన్ని ముష్కర మూకలు దేశంలో ఏదో ఒకచోట అదనుచూసి దాడులకు పాల్పడుతున్నాయి. ఇటీవల హైదరాబాద్‌లో బాంబు పేలుళ్ల ఘటన నేపథ్యంలో ఉగ్రవాదుల తదుపరి దృష్టి విశాఖ వంటి ద్వితీయశ్రేణి నగరాలపైన పడే అవకాశం ఉందని పలువురు రక్షణ రంగ నిపుణులు విశ్లేషిస్తున్నారు. విదేశీ పర్యాటకులతో నిత్యం కళకళలాడే ప్రశాంత నగరం విశాఖలో భద్రత ఏ స్థాయిలో వుందన్నది ప్రస్తుతం చర్చనీయాంశంగా మారింది. నగరంలో ఉగ్రవాద సంస్థల ఉనికే లేదని, ఒకవేళ అలాంటి సందర్భం తలెత్తినా కౌంటర్ ఇంటెలిజెన్స్ విభాగంతో పాటు పోలీస్ శాఖ సమర్థంగా ఎదుర్కొంటుందని ఆ శాఖ అధికారులు పేర్కొంటున్నా, ఆ స్థాయిలో భద్రతా చర్యలు కానరాకపోవడం నగర వాసులను ఆందోళనకు గురి చేస్తుందనడంలో సందేహం లేదు.