క్రికెట్‌ లవర్స్‌ కోసం విశాఖ స్టేడియం రెడీ అవుతోంది. డిసెంబర్‌ రెండున ఇండియా- వెస్టిండీస్‌ మధ్య జరిగే వన్డే మ్యాచ్‌ కోసం చురుగ్గా ఏర్పాట్లు సాగుతున్నాయి. ఈ మ్యాచ్‌ టికెట్ల అమ్మకాలు ఇవాళ్టి నుంచే మొదలవుతున్నాయి. సాగర తీరాన చాలా రోజుల తర్వాత ఓ వన్డే మ్యాచ్‌. అందులోనూ డే అండ్‌ నైట్‌. ఇంకేముంది విశాఖ వాసులు పండుగ చేసుకుంటున్నారు. ఇండియా- వెస్టిండీస్‌ జట్ల మధ్య డిసెంబర్‌ 2న జరిగే మ్యాచ్‌ కోసం అప్పుడే రెడీ అవుతున్నారు. ఫ్లడ్‌ లైట్ల వెలుగులో క్రికెట్‌ చూసేందుకు ఉవ్విళ్లూరుతున్నారు. టెస్ట్‌ సిరీస్‌లో టీమిండియా సత్తా చూపడంతో, వన్డేలో కూడా అదే జోష్‌ కొనసాగుతుందని క్రికెట్‌ ఫ్యాన్స్‌ నమ్ముతున్నారు. ఎలాగైనా మ్యాచ్‌ను లైవ్‌గా చూడాలని ఏర్పాట్లు చేసుకుంటున్నారు.

ఈ మ్యాచ్‌ టికెట్లను ఇవాళ్టి నుంచి అమ్మనున్నారు. నగరంలోని అన్ని ఈ-సేవా కేంద్రాలతో పాటు స్టేడియంలో ప్రత్యేకంగా కౌంటర్లను ఏర్పాటు చేశారు. 200 రూపాయల నుంచి 3 వేల రూపాయల దాకా వివిధ ధరలలో టికెట్లను అందుబాటులో ఉంచారు. నగరంలో మొత్తం 21 సెంటర్ల ద్వారా టికెట్లను అమ్మాలని నిర్ణయించారు. రెండు వేలకు పైగా టికెట్లను క్రికెట్‌ క్లబ్‌లకు ఇవ్వాలని కూడా నిర్వాహకులు నిర్ణయించారు.