సహజంగా ప్రతిఒక్కరు ఇంటి నిర్మాణంలో అనేక జాగ్రత్తలు తీసుకుంటారు. తమ కట్టుకున్న ఇళ్లు చాలా అందంగా, ఆకర్షణీయంగా కనిపించాలని అనేక మార్గాలను వెదుకుతుంటారు. పొదిరిళ్లలో వుండే లివింగ్ రూమ్ నుంచి పడకగది, వంటగది, స్నానం చేసుకునే గదుల విషయంలో ఎక్కువ శ్రద్ధను చూపిస్తారు. 

ఇంట్లో రూముల అలంకరణ ఎలా వుంటే బాగుంటుంది, ఎటువైపుంటే బాగుంటుంది, ఎక్కడ వుండాలనే విషయాల గురించి దీర్ఘంగా ఆలోచించి మరీ నిర్ణయాలు తీసుకుంటారు. అయితే ఒక చిన్న రూమ్ అయిన పూజ గది గురించి ఎక్కువ ఆసక్తి చూపరు. ఇష్టం వచ్చినవిధంగా ఏదో ఒక మూల పూజ గది కట్టించి వదిలేస్తారు. 

ప్రస్తుతకాలంలో కొంతమంది పూజగదిని కిచెన్ రూమ్ లో ఒక చిన్న అల్మరా రూపంలో కేటాయించుకుంటే.. మరికొంతమంది హాలులో కట్టించుకుంటున్నారు. అయితే కొంతమంది ఎక్కువ భక్తితో దేవుడికి పూజకోసం ఒక ప్రత్యేక గదిని నిర్మించుకుంటారు. ఇంకొక విచిత్రమైన విషయం ఏమిటంటే.. కొంతమంది ఇళ్లల్లో అసలు పూజగదులు అంటూ ప్రత్యేకంగా ఏమీ వుండవు. 

అయితే ఇప్పుడు మనం పూజగది నిర్మాణం గురించి, అది ఎక్కడ వుండాలి? అలాగే అనేక విషయాల గురించి ఒకసారి చర్చిద్దాం....

వాస్తు ప్రకారం పూజామందిరాన్ని ఈశాన్య దిశగా ఏర్పాటు చేసుకోవడం చాలా మంచిదని శాస్త్రాలలో పేర్కొనబడింది. అలాకాకుండా వంటగదిలోగాని, బాల్కనీలోగాని, అందంగా కనిపిస్తుందని ఏదో ఒకచోట నిర్మించుకోవడం వల్ల చెడు ఫలితాలు ఎదురవుతాయని వాస్తుశాస్త్రాలు చెబుతున్నాయి. కాబట్టి అలా చేయకోకుండా జాగ్రత్తలు తీసుకుంటే చాలా మంచిది. 

పూజాగదిని లివింగ్ రూమ్ లో లేదా ప్రత్యేకంగా, అందంగా అలంకరించుకోవాలనుకుంటే... ముందుగా అది ప్రశాంతమైన వాతావరణం ప్రదేశాన్ని కలిగి వుండాలి. అప్పుడే పూజా కార్యక్రమాలు నిర్వహించుకోవడానికి ఎటువంటి అంతరాయం కలగదు. 

వాస్తు ప్రకారం పూజా గదిని ఈశాన్యంలో ఏర్పాటు చేసుకున్న తరువాత... అందులో నాలుగు అంగుళాల ఎత్తులో ప్లాట్ ఫామ్ లాగా కట్టుకోవాలి. అందులో మీకు నచ్చిన దైవపటాలను వుంచుకోవాలి. అదేవిధంగా గోడలకు వినాయకుడు, రాధాకృష్ణుడి చిత్రపటాలు, ఇంకా మీరు ఆధ్యాత్మికంగా కోరుకునే పటాలను అలంకరించుకోవచ్చు. గదిలో ఓ మూల దీపాల స్టాండ్ అమర్చినట్టయితే పూజగది చాలా అందంగా కనిపిస్తుంది. 

పాలరాతితో లేదా ఫైబర్ తో తయారుచేయించుకున్న పూజామందిరాలు గదిగే కొత్త అందాన్ని తెచ్చిపెడతాయి. ఇటాలియన్ ఫైన్ మార్బుల్స్ లేదా సిరామిక్ టైల్స్ తో పూజా గదిలో అమర్చుకుంటే చాలా బాగుంటాయి.